Illyustrativ foto

Oʻzbekistonga 200 ta dukkakli ekin ekish-yigʻish texnikalari olib kelinadi. Bu haqda Prezident raisligida oʻtayotgan videoselektor yigʻilishida maʼlum qilindi.

Qayd etilishicha, eksportda eng katta zaxiralardan biri – dukkakli mahsulotlar. Har yili 450 million dollarlik loviya, mosh, tariq va noʻxat eksport qilinmoqda.

Bu ekinlar paxta bilan bir vaqtda yetilgani, ishchi kuchi yetishmagani uchun hosilning 30 foizi isrof boʻlmoqda. Lekin birorta hokim shu paytgacha yangi ekin yerlarini koʻpaytirish u yoqda tursin, tayyor hosilning oʻzidan 150-200 million dollar eksport boy berilayotganini hisob-kitob qilmagani tanqid qilindi.

Butun dunyoda fermerlar dukkakli ekinlarni maxsus kombayn bilan yigʻishtiradi. Shu bois Qishloq xoʻjaligi jamgʻarmasidan dukkakli ekin ekish-yigʻish texnikalariga 15 foizgacha subsidiya berilishi, kredit stavkasining 10 foizdan oshgan qismi qoplab berilishi eʼlon qilindi.

Mutasaddilarga bir oyda ushbu tizimni yoʻlga qoʻyish, yil oxirigacha 200 ta bunday texnikani olib kelish topshirildi.

Oʻzimizda dukkakli mahsulot yetishmagani uchun tadbirkorlar import qilib, qayta ishlab, reeksport qilyapti. Lekin eksportchilar respublika ichida tashishga ortiqcha xarajat qilmoqda. Chunki amaldagi tartibga koʻra, mahsulot qaysi chegara postidan kirsa, eksport ham oʻsha yerdan boʻlishi kerak.

Shu munosabat bilan Bojxona qoʻmitasiga bojxona rejimida qayta ishlangan mahsulotni istalgan postdan eksport qilish tizimini yoʻlga qoʻyish topshirildi.