Oʻzbekiston Respublikasi Oliy Majlisi Senati Raisi Tanzila Narbayeva Budapeshtdagi Qahramonlar maydonidagi Nomaʼlum askar yodgorligi poyiga gul qoʻydi hamda Vengriya xalqining ozodlik uchun kurashgan himoyachilari xotirasiga hurmat bajo keltirdi.

Qahramonlar maydonida joylashgan ushbu yodgorlik katta toshli kenotafdan iborat boʻlib, Vatan himoyachilarining mangu xotirasiga hurmat timsoli sifatida qad rostlagan. Yodgorlik “Venger xalqining ozodligi va milliy mustaqilligi uchun jonini fido qilgan qahramonlar shoniga” bagʻishlangan.

Mazkur yodgorlik dastlab 1929-yilda Birinchi jahon urushi qurbonlarini yod etish maqsadida oʻrnatilgan. Keyinchalik 1956-yilda haykaltarosh Beyla Gebxardt loyihasi asosida qayta tiklangan, 2001-yil 20-avgustda esa Andrash Silagiyai tomonidan yaratilgan hozirgi koʻrinishda ochilgan.

Senat Raisi Faxriy mehmonlar kitobida quyidagi soʻzlarni yozib qoldirdi: “Vengriya xalqining erkinligi va milliy mustaqilligi yoʻlida jon fido qilgan qahramonlarning porloq xotirasi oldida chuqur taʼzim bajo qilaman. Ularning mardligi, fidoyiligi va Vatan ravnaqi yoʻlida koʻrsatgan jasorati nafaqat Vengriya tarixining, balki butun insoniyatning bebaho merosidir. Umumiy tarixiy xotira va doʻstlik rishtalari bizning xalqlarimizni yanada yaqinlashtiradi. Ushbu muqaddas maskanga tashrif buyurish biz uchun katta sharafdir”.