Shu kunlarda Shveysariyaning Jeneva shahrida Rotterdam konvensiyasi Tomonlari konferensiyasining oʻn ikkinchi yigʻilishi (RC COP-12) boshlandi. Ushbu anjuman Bazel konvensiyasi Tomonlari konferensiyasining oʻn yettinchi yigʻilishi (BC COP-17) va Stokgolm konvensiyasi Tomonlari konferensiyasining oʻn ikkinchi yigʻilishi (SC COP-12) bilan ketma-ket tarzda 9-maygacha davom etadi.

“Yashirin narsalarni koʻrinarli qilish: kimyoviy moddalar va chiqindilarni oqilona boshqarish” mavzusida oʻtayotgan tadbir xavfli kimyoviy moddalar va chiqindilarning inson salomatligi hamda atrof-muhitga koʻrsatadigan jiddiy taʼsiriga eʼtiborni jalb qilishga qaratilgan.

Anjumanda Oʻzbekiston Respublikasi delegatsiyasi tarkibida Ekologiya, atrof-muhitni muhofaza qilish va iqlim oʻzgarishi vazirligi, FAOning Oʻzbekistondagi vakolatxonasi vakillari, shuningdek, kimyoviy moddalarni boshqarish sohasidagi ekspertlar ishtirok etmoqda. Oʻzbekistonning bu muhim xalqaro forumdagi ishtiroki mamlakatning ekologik xavfsizlikni taʼminlash va aholining salomatligini himoya qilish boʻyicha saʼy-harakatlarga sodiqligini taʼkidlaydi.

Stokgolm va Bazel konvensiyalarining aʼzosi boʻlgan Oʻzbekiston uchun ushbu konferensiyada ishtirok etish Yevropa Ittifoqining moliyaviy koʻmagida FAO bilan birgalikda amalga oshirilayotgan “Xavfli kimyoviy moddalarni oqilona boshqarish boʻyicha texnik koʻmak” loyihasi uchun alohida ahamiyatga ega.

— Oʻzbekistonning Kimyoviy konvensiyalar boʻyicha Tomonlar konferensiyasida ishtiroki xavfli kimyoviy moddalarni boshqarish sohasida xalqaro hamkorlikni mustahkamlash va tajriba almashish uchun muhim imkoniyat taqdim etadi, — dedi FAOning Oʻzbekistondagi vakili oʻrinbosari Sherzod Umarov. — Biz amalga oshirayotgan qoʻshma loyiha nafaqat Chiqindilarni boshqarishning milliy strategiyasini ishlab chiqish va qishloq xoʻjaligidagi xavfli chiqindilar toʻgʻrisida sifatli maʼlumotlar bazasini shakllantirish imkonini beradi, balki Oʻzbekistonning Rotterdam konvensiyasiga qoʻshilish masalasini koʻrib chiqish uchun zamin yaratadi, bu esa mamlakatning ekologik xavfsizligini oshirish yoʻlidagi muhim qadam boʻladi.

Yigʻilish doirasida Rotterdam konvensiyasining III ilovasiga asetoxlor, karbosulfan, xlorpirifos, xrizotil asbest va inson salomatligi hamda atrof-muhit uchun jiddiy xavf tugʻdiradigan boshqa moddalar kabi bir qator xavfli kimyoviy moddalarni kiritish masalalari koʻrib chiqilmoqda.

30-aprel kunining ikkinchi yarmida va 1-may 2025-yil ertalab oʻtkaziladigan yuqori darajadagi yigʻilish Bazel, Rotterdam va Stokgolm konvensiyalarini samarali amalga oshirish orqali atrof-muhitning ifloslanishi, iqlim oʻzgarishi va biologik xilma-xillikning yoʻqolishi kabi muammolarni hal qilish boʻyicha global strategiyalarni muhokama qilish uchun muhim imkoniyat taqdim etadi.

Oʻzbekistonning ushbu yigʻilishda ishtiroki mamlakatning Parij bitimi doirasidagi majburiyatlarini bajarish va resurslardan oqilona foydalanishga urgʻu bergan holda barqaror ijtimoiy-iqtisodiy rivojlanishni qoʻllab-quvvatlash boʻyicha milliy strategiyasining muhim qismi hisoblanadi.