AQSH prezidenti Donald Tramp Qatar hududiga, suverenitetiga yoki strategik ahamiyatga ega infratuzilmasiga qaratilgan har qanday qurolli hujumni AQSH xavfsizligiga tahdid sifatida baholash toʻgʻrisidagi farmonni imzoladi. Bu haqda Oq uy saytida eʼlon qilingan hujjatda maʼlum qilindi.

Hujjatga koʻra, bunday holatda Qoʻshma Shtatlar barcha qonuniy va zarur choralarni, shu jumladan diplomatik, iqtisodiy va zarurat tugʻilganda harbiy choralarni ham koʻradi. Bu AQSH va Qatar manfaatlarini himoya qilish, shuningdek, mintaqada tinchlik va barqarorlikni tiklashga qaratilgan.

Farmonda taʼkidlanishicha, AQSH va Qatarni koʻp yillik yaqin hamkorlik, umumiy manfaatlar va mustahkam harbiy munosabatlar bogʻlab turibdi. Qatarda AQSH harbiy kontingenti joylashgan boʻlib, mamlakat mintaqaviy va global barqarorlikni taʼminlashda Vashingtonning muhim hamkorlaridan biri hisoblanadi.

Hujjatda AQSH siyosati Qatarni tashqi tajovuzdan himoya qilish va uning xavfsizligi hamda hududiy yaxlitligini kafolatlashga qaratilgani qayd etilgan.

Eslatib oʻtamiz, sentyabr oyida Isroil Qatar poytaxti Dohaga zarba berib, bir harbiy xizmatchi halok boʻlgan edi. Zarba maqsadi sifatida HAMAS harakati rahbarlari koʻrsatilgan. Keyinroq Isroil bosh vaziri Binyamin Netanyahu Qatardan rasmiy uzr soʻragan edi.