11-sentyabr kuni boʻlib oʻtgan elektron auksionda “Elektrtarmoqqurilish” AJning Chirchiq metall tuzilmalar zavodi bino va inshootlari sotildi.

Chirchiq metall tuzilmalar zavodini auksionda yagona narx taklifini bergan “UET CONSTRUCTION” MCHJ 39,9 mlrd soʻmga sotib oldi. Bu haqda “E-auksion” saytidagi maʼlumotlarga asoslanib xabar berish mumkin.

Maʼlum boʻlishicha, kompaniya muhandislik inshootlari qurilishi bilan shugʻullanadi, ustav kapitali – 1,2 milliard soʻmni tashkil etadi.

Kun.uz saytining yozishicha, kimoshdi savdosi 24 daqiqa davom etgan va unda 39,9 milliard soʻm (boshlangʻich bahodan 5 foiz yuqori) narx taklifini bergan “UET CONSTRUCTION” MCHJ gʻolib deb topilgan. Savdo vaqtida bu korxonadan boshqa ishtirokchilar taklif bermagan.

Obyekt Toshkent viloyati Chirchiq shahri Transformatorchilar koʻchasida joylashgan boʻlib, 4,6 gektar maydonni egallagan. Investor obyektning sotilgan yakuniy narxidan 50 foizi miqdoridagi summani 10 kun mobaynida toʻlashi, qolgan qismini 6 oy muddat ichida toʻlashi kerak.

Kompaniyaning rasmiy saytida 1966-yilda Oʻzbekiston va butun Markaziy Osiyo mintaqasidagi elektr stansiyalarini taʼmirlash va texnik xizmat koʻrsatishni taʼminlash strategik maqsadi bilan “Oʻzbekenergotaʼmir” AJ tashkil etilgani va ushbu shirkat uning davomchisi ekanligi bildirilgan.

Avvalroq, Oʻzbekiston 45-Butunjahon shaxmat Olimpiadasida Misr va Angolani taslim etgani haqida xabar berilgandi.