Foto: NBC

AQSH prezidenti Donald Tramp Mudofaa vazirligini Urush vazirligiga qayta nomlash haqida qaror qabul qildi. Bu haqda DW xabar berdi.

“Menimcha, bu gʻalaba va kuch signali hisoblanadi”, — dedi Oq uy rahbari jurnalistlar bilan suhbatda.

Trampning fikricha, yangi nom hozirgi dunyodagi vaziyatdan kelib chiqqan holda ancha toʻgʻriroq va muvofiqroqdir.

Pentagon rahbari Pit Xegset ham oʻz munosabatini bildirib, qayta nomlashni “faqat soʻz emas, balki harbiy etikani tiklash” deb taʼrifladi.

“Endilikda eng yuqori darajadagi oʻtkir kuch, qonunchilikdagi sustlik emas. Qatʼiy kuch, siyosiy tuzatishlar emas. Biz faqat himoyachilar emas, balki haqiqiy jangchilarni tarbiyalaymiz”, — deya qoʻshimcha qildi u.

Shu bilan birga, rasmiy nom oʻzgarishi uchun AQSH Kongressining maʼqullashi talab etiladi. Respublikachi senatorlar Mayk Li, Rik Skott va Greg Styub bu borada qonun loyihasini kiritgan. Demokratlar esa tashabbusni “qimmat va eʼtiborni chalgʻituvchi” deb baholashmoqda.

Maʼlumot uchun, AQSH Mudofaa vazirligi hozirgi koʻrinishda 1947-yilda tashkil etilgan. Ungacha unga kirgan qoʻshin turkumlari alohida boʻlib, 1789-yildan 1947-yilgacha Urush vazirligi nomi bilan faoliyat yuritgan. 1947–1949-yillarda birlashgan idora Milliy harbiy departament deb atalgan, 1949-yildan esa Mudofaa vazirligi nomi bilan faoliyat yuritib kelmoqda.