Avstraliyadagi qoʻriqlanmagan plyajda ikki kishi akula hujumiga uchradi. Bu haqida BILD nashri xabar berdi.

Unda aytilishicha, voqea shu yilning 27-noyabr kuni tongda, Sidneydan taxminan 360 kilometr shimolda joylashgan “Kroudi Bay” milliy bogʻidagi qoʻriqlanmagan plyajda sodir boʻlgan.

Jabrlanuvchilar “GoPro” kamerasi bilan delfinlarni suratga olish uchun suvga tushgan vaqtda akula hujumiga uchragan. Avstraliya OAVning xabar berishicha, hujumga uchragan ikki shaxs ham sportchi boʻlgan.

Akula dastlab 25 yoshli ayolga hujum qilgan. Uning dugonasi ayolni qutqarishga harakat qilib, oʻzi ham jarohat olgan. Shunga qaramay, u doʻstini qirgʻoqqa olib chiqib, qutqaruvchilarni chaqirishga muvaffaq boʻlgan.

Yon atrofdagilar tibbiy yordam yetib kelgunga qadar ikki doʻstga ham yordam koʻrsatgan. Shunga qaramay 25 yoshli ayol dahshatli jarohatlari tufayli voqea joyida vafot etgan.

Uning 26 yoshli dugonasi ham jiddiy jarohatlar olgan va vertolyotda kasalxonaga yetkazilgan. Maʼlumot uchun, Avstraliyada yil davomida akula hujumlari oqibatida besh kishi halok boʻlgan.