Фото: Reuters

Шимолий Кореянинг ҳар қандай ядровий провокацияси режимнинг қулашига олиб келади. 

Ушбу сўзларни АҚШ президенти Жо Байден Оқ уйда Жанубий Корея президенти Юн Сук Ёль билан қўшма матбуот анжумани чоғида айтиб ўтди. Шу ўринда Байден Жанубий Корея раҳбариятини АҚШ ҳар томонлама қўллаб-қувватлашига ишонтирди.

“Шимолий Кореянинг АҚШ, унинг иттифоқчилари ёки ҳамкорларига қарши ядровий ҳужуми қабул қилиб бўлмайди ва бундай чора кўрган ҳар қандай режимнинг барҳам топишига олиб келади”, деди Байден.

Жанубий Корея президенти Юн Сук Ёль Шимолий Кореянинг ҳужумига жавоб тезкор, кучли бўлишини ва барча воситаларни, жумладан, АҚШ ядровий қуролини ҳам ўз ичига олишини қўшимча қилди.

Байден Оқ уйда Юк Сук Ёлни ҳурмат билан қабул қилди. Ҳар икки етакчи икки давлат ўртасида “бузилмас иттифоқ” бўлишини таъкидлаб, Шимолий Кореяга қарши ҳарбий ҳамкорликни кучайтириш бўйича шартнома имзолади.

Сеулнинг ўз ядро қуролига эга бўлмаслик ҳақидаги ваъдаси эвазига Қўшма Штатлар биринчи марта Жанубий Кореяга Шимолий Корея билан зиддият юзага келганда ядро қуролидан фойдаланишни стратегик режалаштиришда марказий ролни беради.

“New York Times” газетасининг ёзишича, АҚШ расмийлари ҳар икки томон Вашингтон декларацияси деб аталаётган келишув Жанубий Корея президентининг шу ҳафта АҚШга қилган давлат ташрифининг асоси бўлганини таъкидлашган.