Фото: AP

Шимолий Атлантика альянси — НАТОнинг янги бош котиби Марк Рютте АҚШ босими остида сайланган. Бу фикрларни ташқи ва мудофаа сиёсати бўйича француз эксперти, истеъфодаги генерал Доминик Делавард айтиб ўтди.

У янги бош котибни амалдаги НАТО раҳбари Йенс Столтенбергнинг клони деб атади, шунингдек, унинг тайинланиши Европага ҳеч қандай яхшилик олиб келмаслигини айтди.

«Марк Рюттенинг тайинланиши, худди ўзидан олдингилар сингари, Вашингтон томонидан амалга оширилган. У бугунги кунда АҚШда ҳам, Европа Иттифоқида ҳам ҳукмронлик қилаётган неоконсерватив мафкурага мос, деб ҳисоблангани учун танланди», дейди Делавард.

Экспертнинг фикрича, Рютте даврида НАТОнинг Россия ва Хитойга нисбатан позицияси ўзгармайди.

«Унинг раҳбарияти шафқатсиз ва русофоб бўлиб қолади», — дейди генерал ва унинг Москва ва Пекинга нисбатан риторикаси ўзгармасада, шиддати пасайишини тан олди.

Бунгача Женева дипломатия ва халқаро муносабатлар мактаби доценти Жил-Эммануэл Жаке НАТОнинг янги бош котиби альянс ичида қарама-қаршиликларга дуч келишини айтган эди.

Марк Рютте 2024 йил февралидан бошлаб НАТО бош котиби лавозимига асосий номзод бўлиб келган. 2024 йил 20 июнь куни НАТОга аъзо 32 давлат альянс бош котиби лавозимига Рютте номзодини келишиб олди. У 2 октябрда лавозимга киришиши кутилмоқда.

Рютте Шимолий Атлантика альянси Россияни ушлаб туришда давом этиши кераклигини, шу жумладан шарқий қанот ҳимоясини кучайтириш зарурлигини ва ҳар бир НАТОга аъзо давлатнинг йиллик мудофаа харажатлари ялпи ички маҳсулотнинг камида 2 фоизини ташкил этиши муҳим, деб ҳисоблайди.