Фото: РИА «Новости»

Ғазо секторида 17 минг нафарга яқин бола ота-онаси ва оиласидан ажралиб қолган. Анклавнинг барча болалари, яъни миллион нафардан ортиқ психологик ёрдамга муҳтож.

Бу маълумотни БМТ Болалар жамғармасининг (UNICEF) Фаластиндаги алоқа бўлими раҳбари Жонатан Криккс Женевада бўлиб ўтган брифингда айтиб ўтди.

“Ҳозирда биз Ғазо секторидаги 17 минг нафар бола ота-онаси ва оиласидан ажралганини тахмин қиляпмиз. Уларнинг ҳаммаси даҳшатли тарихи бор... Ўтган йилнинг декабрь ойида биз анклавдаги 500 минг нафар бола психологик ёрдамга муҳтожлигини айтгандик. Ҳозир анклавдаги барча болалар психологик ёрдам керак, улар бир миллиондан кўпроқ”, дейди Криккс.

Ўтган йилнинг декабрь ойида БМТ Болалар жамғармаси (UNICEF) раҳбари Кэтрин Рассел Ғазо сектори яна болалар учун дунёдаги энг хавфли жойга айланганини айтди. Ғазо секторидаги болаларнинг 80 фоиздан ортиғи озиқ-овқат билан таъминланмаган.

Ғазо секторидаги вазият 2023 йилнинг 7 октябрь куни кескинлашди. Бунга Фаластиннинг ҲАМАС ҳаракатининг ҳарбий қаноти томонидан эълон қилинган “Ал-Ақсо тўфони” операцияси доирасида Исроил ҳудудига юзлаб ракеталар учирилгани сабаб бўлди. Шундан сўнг ташкилот жангчилари Исроил жанубидаги чегара ҳудудларига кириб, у ерда ҳам ҳарбий, ҳам тинч аҳолига қарата ўт очган, шунингдек, 200 дан ортиқ одамни гаровга олган.

Исроил расмийларининг сўнгги маълумотларига кўра, ушбу ҳужум оқибатида тахминан 1,2 минг киши ҳалок бўлган, бу рақам тинч аҳоли, аскарлар, чет эл фуқароларини ўз ичига олади. Шунингдек, 5 мингдан ортиқ киши жароҳат олган.

Бунга жавобан Исроил мудофаа кучлари Ғазо секторида ҲАМАСга қарши “Темир қиличлар” операциясини бошлади. Бир неча кун ичида исроиллик ҳарбийлар Ғазо билан чегара яқинидаги барча аҳоли пунктларини назорат остига олди ва чизиқдаги нишонларга, жумладан, тинч аҳолига ҳаво ҳужумларини бошлади. Шунингдек, Исроил Ғазо секторини тўлиқ блокадага олганини эълон қилди: сув, озиқ-овқат, электр энергияси, дори-дармон ва ёқилғи етказиб бериш тўхтатилди.

Ўтган йилнинг октябрь ойининг охирида Исроилнинг анклавдаги операциясининг қуруқлик босқичи бошланди.

Фаластин анклавининг Соғлиқни сақлаш вазирлиги маълумотларига кўра, 2023 йилнинг 7 октябридан бери Исроилнинг ҳужумлари оқибатида Ғазода 27 минг кишидан ортиқ одам ҳалок бўлган, 66 мингдан кўп одам жароҳатланган.