Фото: РИА Новости

Россия президенти Владимир Путин Украина Қуролли Кучлари Курскка бостириб кирганидан бери илк бор ушбу ҳудудга келди ва рус қўшинларининг Курск гуруҳи штаб-квартирасида йиғилиш ўтказди.

Путин ҳарбий хизматчилар билан учрашувга ҳарбий либосда келган. Кремль тарқатган кадрларда у Россия Қуролли кучлари Бош штаби бошлиғи Валерий Герасимовнинг ҳисоботини тинглаётгани акс этган.

«Бизнинг вазифамиз Курск вилояти ҳудудига бостириб кирган душманни бутунлай мағлуб этиш ва ҳудудни тўлиқ озод қилишдир», – деди Владимир Путин ҳарбийлар билан мулоқотда.

Путин Украина билан чегарада хавфсизлик ҳудудини яратиш ҳақида «жиддий ўйлашни» таклиф қилди. Бундан олдин, у Курск вилоятидаги давлат чегарасидаги вазиятни тиклаш муҳимлигини таъкидлади.

Путинга Украина Қуролли Кучларининг йўқотишлари ҳақида маълумот берилди

Герасимовнинг хабар беришича, Украина Қуролли Кучлари Курск вилоятида қуршаб олинган ва ҳозирда изоляция қилинган. Айни пайтда уларни тизимли равишда йўқ қилиш чоралари кўрилмоқда.

«Россия Қуролли Кучлари бўлинмаларига имкон қадар тезроқ давлат чегарасига етиб бориш вазифаси қўйилди», – дейди Валерий Герасимов.

Бош штаб раҳбари, шунингдек, Россия армияси Украина Қуролли Кучлари томонидан босиб олинган Курск вилояти ҳудудининг 86 фоизини – тахминан 1100 квадрат километрни озод қилишга муваффақ бўлганини маълум қилди. Уларнинг 259 квадрат километри сўнгги беш кун ичида озод қилинган. Украинанинг йўқотишлари 68 мингдан ортиқ одамни ва 7 мингдан ортиқ техникани ташкил этди. Қайд этилишича, Курск вилоятидаги 24 аҳоли пункти сўнгги 5 кун ичида озод қилинган.

Герасимов Украина Қуролли Кучлари Малая Локня қишлоғини озод қилишда катта йўқотишларга учраганини алоҳида таъкидлади. Унинг сўзларига кўра, артиллерия ва дронлардан ўққа тутилган кичик душман гуруҳлари одамларини йўқотиб, жанубий йўналишда чекинишни бошлаган.

Путин Россия барча ҳарбий асирларга инсонпарвар муносабатда бўлишини, бироқ Украина қўшинлари томонида жанг қилаётган хорижлик ёлланма аскарлар Женева конвенциясига кирмаслигини таъкидлади. У, шунингдек, Курск вилоятида қўлга олинган украиналик ҳарбийларга террорчи сифатида муносабатда бўлиш кераклигини таъкидлади. Ўз навбатида, Герасимов Украина қуролли кучларининг 400 дан ортиқ аскари минтақада асирга олинганига аниқлик киритди.

Герасимов Россия қўшинларини газ қувури орқали Суджага ёриб ўтиш операциясини қайд этди. Унинг маълум қилишича, маневрда 600 дан ортиқ ҳарбий хизматчилар қатнашган, уларда фахрийлар бўлинмалари, «Ахмат» махсус кучлари, 11-бригада ва 30-полк жангчилари алоҳида ажралиб туришган. Путин Курск вилоятида жанг қилаётган рус аскарлари билан доимий алоқада эканлигини айтди.

Украина Қуролли Кучларининг Курск вилоятига бостириб киришидан мақсадни тушунтирган Герасимов, Киевнинг минтақада стратегик таянч яратиш, Россия кучларини Донбассдан узоқлаштириш ва вазиятни савдолашиш воситасига айлантириш истагида эканлигини билдирди. «Бу режалар барбод бўлди», деди у.