14 июнь куни АҚШ пойтахти Вашингтон шаҳрида Америка армиясининг 250 йиллиги муносабати билан кенг кўламли ҳарбий парад ташкил этилди. Ушбу тантанали тадбир мамлакат президенти Дональд Трампнинг 79 йиллик туғилган куни билан бир вақтда бўлиб ўтди. Президент Трамп ва унинг рафиқаси Мелания парадга шахсан ташриф буюриб, тадбирни трибуна орқали кузатди ҳамда нутқ сўзлади.

Маҳаллий ОАВ хабарларига кўра, парадда 6600 нафарга яқин ҳарбий хизматчи, 50 та ҳарбий вертолёт ва «M1 Abrams» жанговар танклари иштирок этди. Шу муносабат билан шаҳарда хавфсизлик чоралари кучайтирилди. Томошабинлар орасида Америка байроқлари кўтарилган бўлиб, кўпчиликнинг бошида «Американи яна буюк қиламиз» («Make America Great Again») ёзуви туширилган қизил кепкалар бўлган.

Президент Трамп ҳарбий парад доирасида янги аскарлар ва армияга қайтган ҳарбий хизматчиларни тантанали тарзда қасамёдга келтирди. У ўз мурожаатида: «Қўшма Штатлар армиясига хуш келибсиз! Ҳаётингизда омад ёр бўлсин», – дея миннатдорчилик билдириб ўтди.

Бироқ ҳарбий тантаналар фонида мамлакатнинг бир қанча йирик шаҳарларида Доналд Трампнинг сиёсатига қарши оммавий норозилик намойишлари ҳам бўлиб ўтди. «No Kings» («Подшоҳлар керак эмас») шиори остида ўтказилган митинглар Трампнинг автократияга мойил сиёсати, миллиардерлар манфаатини кўзлаш ва АҚШ демократиясининг милитаризациялашувига қарши йўналтирилган эди. Ушбу норозиликлар айнан президентнинг туғилган кунига тўғри келганлиги билан эътиборга молик.

Эслатиб ўтамиз, Трамп ўзининг биринчи президентлик даврида ҳам шундай парад ўтказишни истаган эди. 2017 йилда у Франция президенти Эммануел Макроннинг таклифига биноан Парижда Бастилия куни парадини томоша қилганидан сўнг, АҚШда ҳам шундай тадбирни ташкил этишни режалаштирган. Бироқ бундай параднинг харажатлари 90 миллион долларга тенг бўлиши аниқлангач, бу режа амалга оширилмаган эди.