Gʻijduvon tumani markazidan 180 kilometr olisda joylashgan Oyoqogʻitma aholi punkti hududida “Acwa Rower Bash Wina” shamol elektr stansiyasi qurilib, ishga tushirildi.

Umumiy qiymati 650 million AQSH dollariga teng bu loyihaning amalga oshirilishi yiliga 1,8 milliard kilovatt/soat elektr energiyasi ishlab chiqarish imkonini beradi. Tumanning elektr energiyasiga boʻlgan ehtiyojini qondiribgina qolmay, ekologik barqarorlikni taʼminlash va tabiiy gaz isteʼmolini kamaytirishga xizmat qiladi. Jumladan, yiliga 500 million kub metr tabiiy gaz tejaladi.

Tumanda keyingi yillarda sanoat korxonalari soni oshib bormoqda. Ular hamda turli tashkilot va aholining elektr energiyasiga boʻlgan talabi 300 megovattni tashkil etadi. Vaholanki, yangi shamol elektr stansiyasining quvvati 500 megovattdir.

—Bizdagi maʼlumotlarga qaraganda, bu yirik loyihani amalga oshirish oson kechgani yoʻq, — deydi mehnat faxriysi R. Avezov. — 285 gektar maydonda qurilish ishlari olib borildi. Beton ishlab chiqaruvchi ikkita liniya barpo qilindi. 79 ta zamonaviy shamol generatorlari oʻrnatildi. 650 nafardan ziyod mutaxassis murakkab choʻl sharoitida mehnat qildi. Shu oʻrinda yurtimiz “yashil energetika” salohiyatini yuksaltirishda, mazkur inshootni barpo etishda Saudiya Arabistoni investorlari –“ Acwa Rower” kompaniyasi tadbirkorlarining hissasi katta ekanini aytish zarur.

Shamol elektr stansiyasining foydalanishga topshirilishi munosabati bilan oʻtkazilgan tantanali tadbirda investorlar, quruvchilar, tuman masʼullari va faollari, nuroniylar ishtirok etdi. Unda soʻz olganlar Buxoro energetikasi tarixidagi bu muhim voqea bilan barchani qutlab, yirik inshoot iqtisodiyotimizni mustahkamlashga, xalqimiz turmush darajasini yuksaltirishga xizmat qilajagini taʼkidladi.

Samad DAMINOV,

Oʻzbekiston Jurnalistlar uyushmasi aʼzosi