Samarqand, Qashqadaryo viloyatlari va Qoraqalpogʻiston Respublikasida noqonuniy alkogol va tamaki mahsulotlari savdosi bilan shugʻullangan shaxslar aniqlandi. Bosh prokuratura huzuridagi Departamentning Qoʻshrabot va Toʻrtkoʻl tumani boʻlimlari, shuningdek, IIB va bojxona boshqarmasi xodimlari hamkorligida oʻtkazilgan tezkor tadbirlar natijasida qator huquqbuzarlik holatlari fosh qilindi.

Tadbir davomida YATT “T.N.” va fuqaro M.J. Samarqand viloyatining “Zarkent” MFY hamda Qoraqalpogʻistonning “Shoʻroxon” OFY hududidagi savdo doʻkonlarida sifatini tasdiqlovchi hujjatlari boʻlmagan va qoʻlbola usulda tayyorlangan 29 turdagi 493 dona qalbaki aksiz markali alkogol mahsulotlari va 258 quti tamaki mahsulotlarini sotuvga qoʻyganliklari aniqlandi. Mazkur mahsulotlar ashyoviy dalil sifatida olindi.

Shuningdek, Qashqadaryo viloyatining Kasbi tumanida ham noqonuniy alkogol mahsulotlari savdosi fosh etildi. Departamentning Kasbi tumani boʻlimi va IIB xodimlari hamkorligida oʻtkazilgan tezkor tadbirda fuqaro I.Sh. fuqaro J.Oʻ.ga 546 dona qoʻlbola usulda tayyorlangan alkogol mahsulotlarini sotgan vaqtida ashyoviy dalillar bilan ushlandi.

Huquqbuzarliklar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) boʻyicha jinoyat ishlari qoʻzgʻatildi. Hozirda tergov harakatlari olib borilmoqda.