TASS xabariga koʻra, AQSH prezidenti Donald Tramp Koreya yarimorolida uzoq yillardan beri davom etayotgan mojaro va rasmiy urush holatiga yakun yasashga vaʼda berdi.

“Bilaman, siz Koreya yarimorolida hali ham rasmiy ravishda urush holatidasiz, ammo bu masalani hal etish uchun nimalar qilish mumkinligini koʻramiz”, — dedi Tramp Janubiy Koreya prezidenti Li Chje Myon bilan uchrashuvda.

AQSH yetakchisi ushbu masalada Janubiy Koreya prezidenti jamoasi hamda boshqa manfaatdor tomonlar bilan “juda jiddiy ishlashini” taʼkidladi.

“Koʻramiz, balki oqilona bir yechim topishimiz mumkin”, — deya qoʻshimcha qildi Tramp.

Eslatib oʻtamiz, Koreya urushi 1950-yil iyunida boshlangan. 1953-yil iyulida 38-parallel chizigʻida joylashgan Panmunjom qishlogʻida oʻt ochishni toʻxtatish toʻgʻrisida bitim imzolangan. Shu bilan 248 kilometr uzunlikdagi demarkatsiya chizigʻi tashkil etilgan. BMT kontingenti hanuzgacha Janubiy Koreya hududida boʻlib, sulh shartlariga rioya etilishini nazorat qiladi va demilitarizatsiya zonasi xavfsizligini taʼminlaydi. Shu paytgacha Shimoliy va Janubiy Koreya oʻrtasida toʻliq tinchlik shartnomasi imzolangan emas.