Davlat xavfsizlik xizmatining Fargʻona viloyati boʻyicha boshqarmasi xodimlari tomonidan ichki ishlar organlarini jalb qilgan holda oʻtkazilgan tezkor tadbirda “Hizb ut-Tahrir” diniy ekstremistik tashkilotining yashirin guruhi fosh etildi. Bu haqida “Xavfsizlik” Telegram-kanalida xabar berildi.

Xabarda aytilishicha, Qoʻqon shahrida yashovchi, 1962-yilda tugʻilgan, muqaddam “Hizb ut-Tahrir” tashkilotiga aʼzo boʻlib, Jinoyat Kodeksining 159 va 244 prim 1 hamda 244 prim 2 moddalarida nazarda tutilgan jinoyatlarni sodir etganligi uchun 2000-2019-yillarda ozodlikdan mahrum qilish jazosini oʻtagan shaxs 1965-1971-yillar oraligʻida tugʻilgan 4 nafar fuqaroni jalb qilgan holda noqonuniy guruh tuzgan.

Shundan soʻng, guruh aʼzolari 2024-2025-yillar davomida Qoʻqon shahridagi choyxona va oshxonalarda oʻtkazilgan oʻzaro yigʻinlarda “Hizb ut-Tahrir” gʻoyalarini Oʻzbekistonga olib kirilishini, ushbu tashkilot tomonidan chop etilgan kitob va jurnallarda ifodalangan aqidaparastlikni, xalifalik davlati qurish gʻoyalarini qoʻllab-quvvatlab kelishgan.

Shuningdek, “Telegram” messenjeridagi yopiq kanalga aʼzo boʻlib, unda “Hizb ut-Tahrir” DETga tegishli materiallar bilan muntazam tanishib borishgan.

Taʼkidlash lozimki, guruhning 1971-yilda tugʻilgan aʼzosi ham muqaddam “Hizb ut-Tahrir” tashkilotidagi ishtiroki uchun 23-yillik jazo muddatini oʻtab, 2024-yilning aprel oyida ozodlikka chiqqan boʻlsa, boshqa bir aʼzosi esa firibgarlik bilan bogʻliq jinoyati uchun qonun oldida javobgarlikka tortilgan boʻlgan.

Hozirda mazkur shaxslarga nisbatan Jinoyat Kodeksining 159 va 244 prim 1 hamda 244 prim 2 moddalari bilan jinoyat ishi qoʻzgʻatilib, qamoq ehtiyot chorasi qoʻllanilgan.