Foto: Dunyo

Oʻzbekistonning birinchi elchisi Farrux Tursunov Andorra hamraisi, Fransiya Prezidenti Emmanuel Makronga ishonch yorliqlarini topshirdi. Bu haqda “Dunyo” axborot agentligi xabar berdi.

Qayd etilishicha, Farrux Tursunov tantanali marosim davomida Fransiya rahbariga Oʻzbekiston Prezidenti Shavkat Mirziyoyevning salomi va ezgu tilaklarni yetkazgan. Emmanuel Makron ham Oʻzbekiston rahbariga oʻz hurmati va minnatdorligini bildirib, ikki davlat oʻrtasidagi munosabatlar alohida ahamiyat kasb etishini taʼkidlagan.

Qolaversa, Fransiya yetakchisi Oʻzbekiston bilan ikki tomonlama hamkorlikni mustahkamlash muhim vazifa ekanini alohida taʼkidlab, elchining professional diplomatik mahorati mamlakatlar oʻrtasidagi munosabatlarni yanada rivojlantirishga ishonch bildirgan.

“Biz Oʻzbekiston bilan doʻstona aloqalarni mustahkamlashga katta ahamiyat qaratamiz va barcha sohalarda hamkorlikni yanada kengaytirishga tayyormiz”, degan Emmanuel Makron.

Maʼlumot uchun, Farrux Tursunov 2023-yilning 7-dekabr kuni Oʻzbekistonning Ispaniyadagi Favqulodda va muxtor elchisi etib tayinlangan edi. Shuningdek, u Oʻzbekistonning “BMT Turizm” tashkilotidagi (avvalgi Butunjahon turizm tashkiloti) doimiy vakili hisoblanadi.