Foto: Prezident matbuot xizmati

Iordaniya Podshohining davlat tashrifi doirasida Oʻzbekiston Respublikasi Prezidenti Shavkat Mirziyoyevni Iordaniyaning “An-Nahda“ (“Renessans“) ordeni bilan taqdirlash marosimi boʻlib oʻtdi.

Ushbu mamlakatning oliy mukofotini davlatimiz rahbariga Iordaniya Hoshimiylar Podshohligi Podshohi Abdulla II ibn al-Husayn shaxsan topshirdi.

- Ushbu mukofotni koʻp qirrali hamkorlikni kengaytirish borasidagi umumiy saʼy-harakatlarimizning munosib eʼtirofi, shuningdek, mamlakatimizda Uchinchi Renessans poydevorini yaratayotgan Oʻzbekiston xalqiga doʻstona munosabat va hurmat ifodasi sifatida katta mamnuniyat bilan qabul qilaman, — dedi Prezidentimiz.

Iordaniya Podshohining Oʻzbekistonga tarixiy tashrifi va samarali muzokaralar natijasida mamlakatlarimiz oʻrtasidagi munosabatlar yangi sheriklik darajasiga koʻtarildi.

Yetakchilar siyosiy, savdo-iqtisodiy, investitsiyaviy, transport va madaniy-gumanitar sohalardagi hamkorlikni har tomonlama rivojlantirishga kelishib oldilar.

Davlatimiz rahbari Podshoh Abdulla II ibn al-Husayn Iordaniyaning jadal rivojlanishiga, mamlakatning tinchliksevar tashqi siyosatini amalga oshirishga, xalqaro hamjamiyatdagi nufuzi va taʼsiri yuksalishiga qoʻshgan hissasini alohida qayd etdi.

Prezidentimiz ushbu yuksak mukofot Oʻzbekiston va Iordaniya xalqlari oʻrtasidagi mustahkam doʻstlik ramzi sifatida munosib oʻrin egallashini taʼkidladi.

Davlatimiz rahbari soʻzining yakunida Podshoh Abdulla II ibn al-Husaynga mukofot uchun yana bir bor minnatdorlik bildirib, Iordaniya xalqiga tinchlik-osoyishtalik va ravnaq tiladi.