Botir MADIYOROV/“Xalq soʻzi”. Rishton tumanida aholini sifatli elektr energiyasi bilan taʼminlash, tizimdagi mavjud muammolarni bartaraf etishga alohida eʼtibor qaratilmoqda.

Bu borada tuman elektr taʼminoti korxonasi tomonidan mahallalar kesimida ishlab chiqilgan dastur asosida past kuchlanishli tarmoqlarni yangilash, modernizatsiya qilish ishlari olib borilmoqda. Xususan, besh mingdan ziyod aholi istiqomat qiluvchi “Miskin” mahalla fuqarolar yigʻinida elektr taʼminotini yaxshilash uchun eski yogʻoch ustunlar oʻrniga yangi beton tayanch ustunlari oʻrnatildi. Mahalladagi ayrim koʻchalarga qoʻshimcha tarmoq tortish ishlariga kirishildi.

— Oltin vodiy va Olmazor koʻchasidagi qariyb 300 nafar isteʼmolchini barqaror ravishda elektr energiyasi bilan taʼminlash maqsadida eski simyogʻochlar 150 ga yaqin beton tayanch ustunlarga almashtirildi,—deydi mahalla raisi Madaminjon Dehqonov. — Hozirda ikkita transformator oʻrnatish, 4,5 km uzunlikda elektr tarmogʻi tortish ishlari yakuniga yetkazilyapti. Natijada mazkur ikki koʻchada yashovchilarni koʻp yillar davomida qiynab kelgan muammo toʻliq bartaraf etiladi.