Foto: Boks federatsiyasi

Boks boʻyicha Oʻzbekiston terma jamoasi “World Boxing” tashkiloti kubogini umumjamoa hisobida 1-oʻrin bilan yakunladi, deb xabar bermoqda Oʻzbekiston boks federatsiyasi.

Qayd etilishicha, joriy yilning 31-martidan 5-aprel kuniga qadar Braziliyaning Fos-du-Iguasu shahri mezbonligida “World Boxing” tashkiloti kubogi bahslari boʻlib oʻtdi.

Toʻlqin Qilichev boshchiligidagi Oʻzbekiston terma jamoasi erkaklar kesimida 10 ta vaznning 8 tasida gʻolib va sovrindorlar qatoridan joy oldi. Xususan, vakillarimiz 7 ta final yoʻllanmasini qoʻlga kiritib, yakunda 5 ta oltin, 2 ta kumush medallarini qoʻlga kiritdi. Shuningdek, jamoa hisobida 1 ta bronza medali ham bor. Albatta bu natija oʻzbek bokschilariga doimgidek umumjamoa hisobida birinchilikni taqdim etdi.

Medallar jamgʻarish boʻyicha keyingi oʻrinni mezbonlar: 3 ta oltin, 2 kumush va 4 ta bronza bilan, uchinchi oʻrin esa, qoʻshni Qozogʻiston jamoasi band etdi. Ular hisobida 3 oltin (ikki erkak, bir ayol) va 3 ta bronza medali bor.

Gʻolib va sovrindor boʻlgan Oʻzbekiston terma jamoasi aʼzolari:

Oltin medal:

• -50 kg. Asilbek Jalilov;
• -75 kg. Fazliddin Erkinboyev;
• -80 kg. Javohir Ummataliyev;
• -90 kg. Toʻrabek Habibullayev;
• +90 kg. Jahongir Zokirov.

Kumush medal:

• -55 kg. Mirazizbek Mirzahalilov;
• -85 kg. Akmaljon Isroilov.

Bronza medal:

• -60 kg. Madiyar Daniyarov.