Олий Мажлис Қонунчилик палатасининг навбатдаги мажлисида халқ вакиллари «Халқаро меҳнат ташкилотининг Меҳнат хавфсизлиги ва гигиенасига кўмаклашиш асослари тўғрисидаги 187-сонли Конвенциясини (Женева, 2006 йил 15 июнь) ратификация қилиш ҳақида»ги қонун лойиҳасини биринчи ўқишда кўриб чиқдилар.

Қайд этилишича, ушбу конвенциянинг асосий мақсади — ишлаб чиқаришда шикастланишлар, касбий касалликлар ва инсонлар ўлимининг олдини олиш учун доимий равишда меҳнат хавфсизлиги ва гигиенасини такомиллаштиришдан иборат.

Халқаро меҳнат ташкилотининг(ХМТ) устувор конвенцияларидан бири бўлган ушбу ҳужжатга биноан меҳнат хавфсизлиги ва гигиенасини доимий равишда такомиллаштиришга кўмаклашиш назарда тутилади. Бугунги кунда Конвенцияни 49 та давлат ратификация қилган.

Депутатларнинг таъкидлашича, конвенция қоидаларининг аксарияти миллий қонунчилигимизга имплементация қилинган. Хусусан, Меҳнат кодексининг 211-моддасига биноан барча корхоналарда хавфсизлик ва гигиена талабларига жавоб берадиган меҳнат шароитлари яратилган бўлиши кераклиги белгиланган бўлса, бундай шароитларни яратиб бериш иш берувчининг мажбуриятига юклатилган. «Меҳнатни муҳофаза қилиш тўғрисида»ги Қонуннинг 23-моддасида иш берувчининг меҳнатни муҳофаза қилиш соҳасидаги ҳуқуқлари ва мажбуриятлари белгилаб берилган.

Қолаверса, мамлакатимизда Меҳнат кодекси, меҳнатни муҳофаза қилиш тўғрисидаги қонун ҳужжатлари ва 300 дан ортиқ меҳнатни муҳофаза қилишга оид қоидалар ҳамда меъёрлар, техник стандартлар амалиётга жорий этилган.

Мажлисда таъкидланганидек, Ўзбекистон Республикаси томонидан 187-сонли Конвенциянинг ратификация қилиниши миллий қонунчиликни янада такомиллаштиришга, меҳнат хавфсизлиги ва гигиенаси соҳасидаги халқаро стандартларни самарали жорий этишга ҳамда халқаро ва минтақавий ташкилотлар билан муносабатларда мамлакатимизнинг ижобий имижини шакллантиришга хизмат қилади.

Қонун лойиҳаси депутатлар томонидан қабул қилинди.