Фото: AP

Шимолий Корея Жанубий Корея билан боғлайдиган йўлларнинг шимолий қисмларини портлатиб юборган. Бу ҳақда Жанубий Корея ҳарбийлари хабар берди.

Душанба куни Сеул Пхеньян йўлларни портлатиб юборишга тайёрланаётгани ҳақида огоҳлантирган эди.

Шимолий Корея ўз қўшнисини мамлакат пойтахти Пхеньян устидан тарғибот варақалари олиб юрган дронларни жўнатганликда айблаганидан кейин Корея ярим оролидаги кескинлик кучайди. Шунингдек, ушбу ҳодиса Шимолий Корея етакчиси Ким Чен Ин бу масалани муҳокама қилиш учун олий ҳарбий ва хавфсизлик амалдорлари билан учрашув ўтказганидан бир кун ўтиб содир бўлди.

Ким бу парвозларни душманнинг жиддий провокацияси сифатида баҳолаган ва мамлакат суверенитетини ҳимоя қилиш учун бир қанча вазифалар қўйган.

Аввалроқ Шимолий Корея агар қўшнисининг учувчисиз самолётлари мамлакатда яна топиладиган бўлса, Жанубий Кореяга фронт артиллерияси ва бошқа армия бўлинмаларини ҳужум қилиш учун тайёр ҳолатга келтирилишини айтган эди. Сеул эса учувчисиз учоқларни жўнатганлигини тасдиқлашдан бош тортди. Шунингдек, фуқароларининг хавфсизлигига таҳдид соладиган бўлса, Пхеньянни қаттиқ жазолаши ҳақида огоҳлантирган.

Жанубий Корея расмийлари Шимолий Корея жорий йил бошида чегарада танкка қарши тўсиқлар қўйиш ва миналарни қўйишни бошлаганини маълум қилган эди.