Ўзбекистоннинг турли ҳудудларида электр энергиясидан ноқонуний фойдаланиш ҳолатлари фош этилди. Бош прокуратура ҳузуридаги Департаментнинг ҳудудий бўлинмалари томонидан ўтказилган терговга қадар текширув ва тезкор тадбирлар натижасида бир нечта қонунбузарлик ҳолатлари аниқланган.

Хусусан, Департаментнинг Нукус шаҳри бўлими томонидан ўтказилган терговга қадар текширув давомида «Т.Г.» МЧЖ масъул шахслари томонидан Тўрткўл кўп тармоқли техникумининг ётоқхона биносида тижорат мақсадида электр тармоғига ўзбошимчалик билан уланиб, 284,1 миллион сўмлик электр энергиясидан ноқонуний фойдаланганлик ҳолати аниқланган. Ушбу ҳаракат натижасида давлатга катта миқдорда моддий зарар етказилган.

Шу билан бирга, Андижон шаҳри бўлими томонидан ўтказилган тезкор тадбирда фуқаро К.Я. маиший хизмат кўрсатиш биносида электр тармоғига ноқонуний тарзда уланиб, 217,8 миллион сўмлик электр энергиясидан фойдаланганлиги фош этилган. Ушбу ҳолат ҳам электр тармоқлари хавфсизлиги ва қонунийлик тамойилларининг бузилганини кўрсатади.

Яна бир ҳолатда, Деҳқонобод тумани бўлими томонидан ўтказилган терговга қадар текширувда фуқаро М.Ш. ўзини тадбиркор сифатида давлат рўйхатидан ўтказмасдан, тегирмон фаолиятини йўлга қўйган ва электр тармоғига ўзбошимчалик билан уланиб, жами 117,9 миллион сўмлик электр энергиясидан ноқонуний фойдаланган.

Мазкур ҳолатлар юзасидан Ўзбекистон Республикаси Жиноят кодексининг 169-моддаси (ўғрилик) асосида жиноят ишлари қўзғатилиб, ҳозирда тергов ҳаракатлари олиб борилмоқда.