Россия Қуролли Кучлари радиация, кимёвий ва биологик ҳимоя қўшинлари бошлиғи генерал Игор Кириллов Москва шаҳридаги уйининг яқинида юз берган портлашда ҳалок бўлиши халқаро жамоатчиликда турли фаразларни илгари суришаётганди.

АҚШ Давлат департаменти вакили Метю Миллер бу воқеага АҚШнинг алоқаси йўқлигини таъкидлади. У ўз баёнотида: «Биз бу воқеа ҳақида олдиндан маълумотга эга эмасдик ва бу ишда иштирок этмадик», — деди.

Генерал Кирилловнинг ўлдирилиши Украина ва Россия ўртасидаги кескинликни яна кучайтирди. Россия Ташқи ишлар вазирлиги вакили Мария Захарова АҚШнинг ўзини бу воқеадан четга олишини танқид қилиб, «бизда аниқ далиллар бор» деб айтди. Украина хавфсизлик хизмати эса генерални «ҳарбий жиноятчи» деб атаб, уни ўлдиришга махсус операция уюштирилганини тасдиқлади.

Генерал Кириллов 2017 йилдан буён Россиянинг радиация, кимёвий ва биологик ҳимоя қўшинларига раҳбарлик қилиб келган. У бир неча марта Украинани ва АҚШни биологик қуроллар ишлаб чиқишда айблаган. Жумладан, у Украина ҳудудида «чивинлар орқали тарқаладиган вируслар»ни ўрганаётган лабораториялар мавжудлигини иддао қилган.

Украина хавфсизлик хизмати вакилининг айтишича, генералнинг уйига яқин жойда турган электр скутер ичига жойлаштирилган қўлбола портловчи қурилма ёрдамида ҳужум амалга оширилган. У Кирилловнинг кимёвий қуролларни Киевга ишлатишга буйруқ берганини айтиб, у Украина ҳарбийлари учун потенсиал нишон бўлганини айтган.

Украина президенти офиси маслаҳатчиси Михаил Подоляк эса, бу каби усулларни рад этиб, «Украина террорчилик усулларини қўлламайди, барча қарорлар жанг майдонида қабул қилинади», деб таъкидлади. Бу воқеа Россия ва Украина ўртасидаги ҳарбий кескинликни янги босқичга олиб чиқиши кутилмоқда.