«Wall Street Journal» нашрининг хабар беришича, «Tesla» компанияси кузатув кенгаши 2025 йил март ойида Илон Маскнинг ўрнига янги бош директор излаш бўйича хэдхантинг агентликлари билан алоқага чиққан. Бу қадам компания акцияларининг қимматсизланиши ва Маскнинг ҳукуматдаги DOGE (Government Efficiency) лойиҳасига ажратган вақти билан боғлиқ жиддий норозилик фонида содир бўлди.

«Tesla»нинг 2025 йил биринчи чорагидаги молиявий ҳисоботлари ҳам бу вазиятни янада кескинлаштирди. Даромад 71% га пасайди ва сотувлар бўйича компания ўз тарихидаги энг ёмон натижаларни қайд этди. Шу куни Маск ўзининг DOGE лойиҳасидан вақтинча чекинишини эълон қилди. Аммо у CEO вазифасида қанча қолиши, кузатув кенгашининг излаш жараёни тўхтатилгани ёки йўқлиги номаълумлигича қолмоқда.

Маълумотларга кўра, март ойида кузатув кенгаши Маскдан компанияда кўпроқ вақт ўтказишни талаб қилган, у эса бунга қарши чиқмаган. «Wedbush Securities» компаниясининг таҳлилчиси Дэн Айвс буни «муваффақиятли қарор» деб баҳолаб, Маск камида яна беш йил CEO сифатида фаолият юритишига ишонч билдирди.

Маскнинг «Tesla»даги фаолияти зиддиятли бўлиб қолди. Унинг сиёсий қарашлари ва Х платформасидаги фаолияти сабаб, «Tesla» кўплаб харидорлар ва фаоллар томонидан танқидга учраган. Компания атрофида намойишлар кўпайди, айрим бозорларда эса брендга бўлган муносабат салбий томонга ўзгарди.

Қолаверса, «Tesla» Хитой билан АҚШ ўртасидаги савдо уруши таъсирида қолмоқда. Маск тарифлар бўйича Трамп маъмурияти билан бир неча марта тортишган. Шунга қарамай, «Tesla» АҚШда ишлаб чиқаришга урғу бергани учун сўнгги ижобий тартиблардан фойда кўриши мумкин.

«Tesla» акцияларининг тушиши, Маскнинг бошқа лойиҳаларга берилганлиги ва компаниядаги иқтисодий муаммолар фонида, Маскнинг CEO вазифасидан кетиш истаги ҳақида ҳам маълумотлар пайдо бўлди. Маск ўзининг дам олишини ва «Tesla»даги миссиясини бошқа шахсга топшириш эҳтимолини маълум қилган. Аммо у ўзининг улкан акция пакетлари ва опционлари сабаб компаниядаги таъсирини йўқотмаслиги мумкин.