Кеча Словенияда суғурта пулини олиш учун ўз соғлиғига ўзи атайин оғир шикаст етказган 22 ёшли қиз устидан суд жараёни якунига етди. Бу ҳақда ABC хабар берди.

Гап шундаки, 2019 йил бошида Юлия Адлесич исмли бу қиз шу тақдирга рози бўлиб, йигити билан биргаликда чап қўлини билагидан тепасидан кесиб ташлаган. Шундан сўнг уни шифохонага олиб келишганда, жароҳатни ўтин арралаётганда олганини айтишган.

Кесилган қўлни эса бирга олиб келишмайди. Шу йўл билан унга тикланиб бўлмайдиган ногиронликни ёздиришади. Ушбу воқеага қадар эса қиз бешта суғурта компанияси билан шартнома имзолаган эди.

Прокуратуранинг хабарига кўра, ушбу "операция"гача қизнинг йигити интернетдан сунъий қўллар қандай ишлаши ҳақидаги маълумотларни қидирган. Улар бу хунук ҳодисани олдиндан режалаштиришганини тасдиқлаш учун етарли далилдир, дейишди қонун ҳимоячилари.

Судда эса қиз айбсиз эканлиги, ҳеч қачон онгли равишда қўлидан айрилмаганини бот-бот такрорлади.

«Ҳеч ким ногирон бўлишни истамайди. Ҳаётим барбод бўлди. 20 ёшимда қўлимдан айрилдим. Бу қандай рўй берганини фақат мен биламан», — деган у судда.

Якунда эса суд уни барибир суғурта билан боғлиқ фирибгарлик қилишга уринишда айбдор деб топди ва икки йилга озодликдан маҳрум этди. Ошиғи эса уч йилга қамалди.