Ijtimoiy tarmoqlarda Toshkent shahri Mirzo Ulugʻbek tumanidagi 142-sonli ixtisoslashtirilgan davlat umumtaʼlim maktabida ichki ishlar xodimlari ishtirokida odob-axloqqa doir boʻlib oʻtgan suhbat notoʻgʻri talqin qilinmoqda. Voqeaga Toshkent shahar Xalq taʼlimi boshqarmasi munosabat bildirdi.

Xususan, 10-sentyabr kuni darsdan soʻng, maktabning maʼnaviyat xonasiga taʼlim muassasasi direktori M.Maraimova, maʼnaviyat-maʼrifat ishlari boʻyicha direktor oʻrinbosari V.Xusanova hamda sinf rahbarlari birgalikda Vazirlar Mahkamasining 2018-yil 15-avgustdagi 666-son qarorining 3-bobida keltirilgan talablariga rioya qilmagan (odob-axloq qoidalari, taʼlim dargohida oʻzini tutish tartiblarini buzgan, sochi 2-3 santimetrdan uzun boʻlgan ) yuqori sinf yigitlari taklif etilgan. Xonada inspektor-psixolog tomonidan maktabning yuqori sinf oʻquvchilari orasida “Tigʻ” tadbiri ham oʻtkazilgan.

Tadbir chogʻida oʻquvchining maktab sumkasidan qaychi topilgan. Topilgan qaychi inspektor-psixolog tomonidan barcha oʻquvchilarga namoyish qilingan holda, bunday kanselyariya qaychisi oʻziga moʻljallangan maxsus gʻilofda olib kelinishi kerakligi haqida tushuntirish ishlari olib borilgan, xolos.

Afsuski, buni ayrim oʻquvchilarning ota-onasi notoʻgʻri talqin etib, ijtimoiy tarmoqlarda foto va videolarni joylaganligi maʼlum boʻldi, deyiladi xabarda.