Foto: MOQ

Toshkent shahridagi “Oʻzekspomarkaz” milliy koʻrgazmalar majmuasida futbol boʻyicha Jahon chempionati kubogining tantanali taqdimoti boʻlib oʻtdi. Bu haqda Milliy olimpiya qoʻmitasi xabar berdi.

Qayd etilishicha, tadbirda Sport vazirligi, Milliy Olimpiya qoʻmitasi, Oʻzbekiston Futbol assotsiatsiyasi rahbariyati, futbol jamoatchiligi va koʻp sonli muxlislar ishtirok etgan. Shuningdek, 2006-yilgi Jahon chempioni, italiyalik Marko Materassi ham taqdimotda qatnashgan.

Maʼlumki, Jahon chempionati kubogi anʼanaga muvofiq har mundial yili jahon turi doirasida koʻplab mamlakatlarga olib boriladi. “Coca-Cola” bilan hamkorlikda yaratilgan “The Original Trophy Is Here” degan imzoga ega samolyot 2026-yilgi Jahon chempionati kubogi rasmiy turida ishtirok etmoqda.

Joriy yilning 3-yanvar kuni Saudiya Arabistonidan boshlangan tur 75 ta joyni qamrab oladi. Samolyot shu kungacha Vena, Seul, Tokio, Nyachang va Kuala-Lumpur kabi Yevropa va Osiyoning oʻnlab shaharlarida boʻldi.

Mazkur tur 2026-yil 11-iyundan 19-iyulgacha boʻlib oʻtadigan Jahon chempionati boshlanishigacha davom etadi.