Toshkent viloyatida qariyb 5 kilogramm giyohvandlik vositasining noqonuniy aylanmasiga chek qoʻyildi. Bu haqida “Xavfsizlik” Telegram-kanali xabar berdi.

Unda aytilishicha, giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmati tomonidan Ichki ishlar va Bojxona organlari bilan hamkorlikda amalga oshirilgan tezkor-qidiruv tadbirlari natijasida katta miqdordagi narkotik modda ashyoviy dalil sifatida rasmiylashtirib olingan.

Xususan, Toshkent viloyati Zangiota tumani hududidan oʻtuvchi Toshkent katta xalqa avtomobil yoʻliga yaqin boʻlgan xufiya joyga muqaddam narkokureʼrlar tomonidan qoldirib ketilgan, jami 10 dona oʻramdagi 4 kilogramm 956 gramm “opiy” moddasi xolislar ishtirokida rasmiylashtirilgan.

Hozirda mazkur holat yuzasidan Jinoyat Kodeksining 273-moddasi 5-qismi bilan jinoyat ishi qoʻzgʻatilib, ushbu ajal ogʻusi egalarining shaxsini aniqlash boʻyicha zarur chora-tadbirlar amalga oshirilmoqda.

“Taʼkidlash lozimki, bu turdagi giyohvandlik vositalari mamlakatimizga xorijdan kontrabanda yoʻli bilan olib kelinadi”, — deyiladi xabarda.