O‘zbekiston Milliy kino san’ati saroyida joriy yilning 2 — 4-mart kunlari “Tatariston kinosi kunlari” bo‘lib o‘tmoqda. Ushbu tadbir doirasida tomoshabinlarga Tatariston kinematografiyasining eng sara filmlari taqdim etiladi.

Bugun “Gora vlyublennix” filmining namoyishi bo‘lib o‘tdi. Namoyishda O‘zbekistonda istiqomat qiluvchi tatar diasporasi vakillari hamda kino ixlosmandlari ishtirok etishdi. Film mashhur tatar shoiri Ildar Yuzeyevning "Gashiyklar tavi" ("Sevgililar tog‘i") asari asosida suratga olingan. Filmda Sayda va Yasmina ismli yoshlarning sevgisi haqida hikoya qilinadi. Ular o‘z sevgilarini abadiy saqlashga va’da berishadi va ular uchun muhim bo‘lgan tog‘da uchrashadilar. Biroq hayot ularni uzoq yillarga ajratib yuboradi.

Shuningdek, Kino saroyga tashrif buyurgan tomoshabinlar yangi ekspozitsiyalar bilan boyitilgan O‘zbekiston Kino san’ati muzeyi faoliyati bilan yaqindan tanishib, milliy kino merosimizning boy va rang-barang tarixidan bahramand bo‘lmoqdalar.

Ma’lumot uchun, “Tatariston kinosi kunlari” doirasida “Nemaya kukushka”, “Ya pridu”, “Gora vlyublennix” hamda “Apipa” filmlarining namoyishi bo‘lib o‘tadi. Ushbu tadbir 4-mart sanasiga qadar davom etadi.