Taxtakoʻpir tumanidagi “Beltov” aholi punktida joylashgan “Tax-tepa” etno qishlogʻida Xalqaro etno-madaniy festivalning ochilish marosimi boʻlib oʻtdi.

Marosimda Qoraqalpogʻiston Respublikasi Joʻqorgʻi Kengesining Raisi Amanbay Orinbayev soʻzga chiqib, yigʻilganlarni festival ochilishi munosabati bilan tabrikladi. Tadbirda, shuningdek, Oʻzbekiston Respublikasi Prezidentining maslahatchisi T.Xudaybergenov, Vazirlar Kengashi Raisi F.Ermanov, Qozogʻiston Respublikasining favqulodda va muxtor elchisi Beybut Atamkulov ishtirok etdi.

Taʼkidlanganidek, asrlar davomida yurtimizda turli millat vakillari yagona xalq sifatida ahil-inoq yashab kelmoqda va mamlakat taraqqiyotiga munosib hissa qoʻshib kelmoqda. Hurmatli Prezidentimizning alohida eʼtibori bilan qayta hayot bagʻishlangan Beltov ovulida keng koʻlamli qurilish, taʼmirlash va obodonlashtirish ishlari amalga oshirilib, qishloq bugun mutlaqo yangi qiyofa kasb etdi.

Qishloq yaqinidagi “Bórshi taw” tepasida barpo etilgan, ajdodlarimiz tarixi va milliy anʼanalarini oʻzida ifoda etuvchi “Tax-tepa” etno qishlogʻi hududga yanada oʻziga xos koʻrk bagʻishlamoqda. Festivalning aynan shu yerda oʻtkazilayotgani ham bejiz emas — bu yerda tashkil etilgan 70 ta Qora uy mamlakatimizda yashayotgan turli millat vakillarining oʻzligini namoyon etsa, qoʻshni qishloq manzarasini aks ettiruvchi 16 ta paxsa uylar orqali ajdodlarimizning turmush tarzi bilan yaqindan tanishish imkoni yaratilgan.

Festival doirasida oʻtkazilgan turli tadbirlar, qardosh xalqlarning milliy urf-odat va anʼanalarini sahnalashtirgan koʻrinishlar, milliy raqs va qoʻshiqlar, xalq oʻyinlari, baxshi va jirovlarning taʼsirli chiqishlari barcha ishtirokchilarga manzur boʻldi.

Yuqori saviyada tashkil etilgan festival xorijiy mehmonlar va mahalliy aholida katta taassurot qoldirdi.

Gʻayrat Otajonov, “Xalq soʻzi”.