Тахтакўпир туманидаги «Белтов» аҳоли пунктида жойлашган «Тах-тепа» этно қишлоғида Халқаро этно-маданий фестивалнинг очилиш маросими бўлиб ўтди.

Маросимда Қорақалпоғистон Республикаси Жўқорғи Кенгесининг Раиси Аманбай Оринбаев сўзга чиқиб, йиғилганларни фестиваль очилиши муносабати билан табриклади. Тадбирда, шунингдек, Ўзбекистон Республикаси Президентининг маслаҳатчиси Т.Худайбергенов, Вазирлар Кенгаши Раиси Ф.Эрманов, Қозоғистон Республикасининг фавқулодда ва мухтор элчиси Бейбут Атамкулов иштирок этди.

Таъкидланганидек, асрлар давомида юртимизда турли миллат вакиллари ягона халқ сифатида аҳил-иноқ яшаб келмоқда ва мамлакат тараққиётига муносиб ҳисса қўшиб келмоқда. Ҳурматли Президентимизнинг алоҳида эътибори билан қайта ҳаёт бағишланган Белтов овулида кенг кўламли қурилиш, таъмирлаш ва ободонлаштириш ишлари амалга оширилиб, қишлоқ бугун мутлақо янги қиёфа касб этди.

Қишлоқ яқинидаги «Bórshi taw» тепасида барпо этилган, аждодларимиз тарихи ва миллий анъаналарини ўзида ифода этувчи «Тах-тепа» этно қишлоғи ҳудудга янада ўзига хос кўрк бағишламоқда. Фестивалнинг айнан шу ерда ўтказилаётгани ҳам бежиз эмас — бу ерда ташкил этилган 70 та Қора уй мамлакатимизда яшаётган турли миллат вакилларининг ўзлигини намоён этса, қўшни қишлоқ манзарасини акс эттирувчи 16 та пахса уйлар орқали аждодларимизнинг турмуш тарзи билан яқиндан танишиш имкони яратилган.

Фестиваль доирасида ўтказилган турли тадбирлар, қардош халқларнинг миллий урф-одат ва анъаналарини саҳналаштирган кўринишлар, миллий рақс ва қўшиқлар, халқ ўйинлари, бахши ва жировларнинг таъсирли чиқишлари барча иштирокчиларга манзур бўлди.

Юқори савияда ташкил этилган фестиваль хорижий меҳмонлар ва маҳаллий аҳолида катта таассурот қолдирди.

Ғайрат Отажонов, «Халқ сўзи».