Oʻzbekiston Respublikasi Prezidenti Shavkat Mirziyoyev Toshkent xalqaro investitsiya forumi tadbirlarida ishtirok etayotgan Qozogʻiston Respublikasi Bosh vaziri Oljas Bektenovni qabul qildi.

Uchrashuv avvalida Oljas Bektenov davlatimiz rahbariga Qozogʻiston Respublikasi Prezidenti Qasim-Jomart Toqayevning salomi va eng ezgu tilaklarini yetkazdi.

Oliy darajadagi uchrashuvlarda erishilgan kelishuvlar doirasida Oʻzbekiston-Qozogʻiston strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalari muhokama qilindi.

Tovar ayirboshlash barqaror ortib borayotgani mamnuniyat bilan qayd etildi. Avtosanoat, elektrotexnika, toʻqimachilik, metallurgiya, farmatsevtika, qurilish, qishloq xoʻjaligi tarmoqlarida loyihalar muvaffaqiyatli amalga oshirilmoqda.

Oʻzaro savdoni koʻpaytirish va ustuvor tarmoqlarda, shu jumladan hududlar darajasida sanoat kooperatsiyasining uzoq muddatli dasturini shakllantirish boʻyicha ikki mamlakat hukumatlari tomonidan muvofiqlashtirilgan chora-tadbirlar koʻrilishi muhim ekani qayd etildi.