Sardoba tumanidagi “Doʻstlik” mahalla fuqarolari yigʻini hududida mahalla servis kompaniyasi tashkil etildi.

Mazkur kompaniya tomonidan elektr usta xizmati, santexnika ishlari, yerga ishlov berish, daraxtlarga shakl va kimyoviy ishlov berish, oqova xandaqlarini qurish va tozalash, quduq qazish kabi jami 23 turdagi xizmatlar koʻrsatilmoqda. Shuningdek, servis kompaniyasi mahalla hududidagi 2,5 kilometr ariqlar, piyodalar yoʻlaklari va 9 ta koʻchaning tozaligini taʼminlab kelmoqda. Shu bilan birga, chiqindilarni toʻplash va saralash uchun maxsus shoxobcha ham barpo etildi.

— Hozirgi paytda viloyatimiz tuman va shaharlarida bittadan mahallada servis kompaniyalari faoliyat koʻrsatmoqda, — deydi Oʻzbekiston mahallalari uyushmasi Sirdaryo viloyati boshqarmasi boshligʻi Uygʻun Xatamov. — Aytish joizki, namuna tariqasida tashkil etilgan ushbu xizmat koʻrsatish majmualari kutilganidan ham yuqori natija berdi. Endilikda mahalla aholisi, ayniqsa chekka hududda yashovchilar turli xizmatlar uchun shaharga yoki tuman markaziga bormasdan, vaqt va xarajatni tejagan holda xizmatlardan foydalanyapti. Yaqin vaqtlarda servis xizmatlari yanada koʻpaytirilib, 25 taga yetkaziladi. Shuningdek, viloyatimizning 221 ta mahallasida ham shunday servis kompaniyalari tashkil etilishi koʻzda tutilgan.

Ahmadali ShERNAZAROV, “Xalq soʻzi”.