UNWTO Butunjahon turizm tashkiloti Bosh assambleyasining 25-sessiyasi doirasida Yevropa ishlari boʻyicha komissiyaning 69-yigʻilishi boʻlib oʻtdi.

Tadbirda nutq soʻzlagan UNWTO Bosh kotibi Zurab Pololikashvili samimiy qabul uchun Oʻzbekiston hukumatiga hamda tashkilotning oliy nizom yigʻilishining barcha aʼzolari va ishtirokchilariga minnatdorlik bildirdi.

“Samarqand boy tarix va madaniy ahamiyatga ega boʻlib, bizning muhokamalarimiz va Yevropa turizmining kelajagi uchun ilhomlantiruvchi zamin hisoblanadi. Biz birgalikda yanada barqaror, inklyuziv va hayotiy turizm sektorini shakllantira olamiz”, — dedi Z.Pololikashvili.

Oʻzbekiston Respublikasi Turizm qoʻmitasi raisi Umid Shodiyev esa UNWTO tomonidan turizmni jahon iqtisodiyotining asosiy omillaridan biriga aylantirish, turizm sohasidagi taʼlimni oʻzgartirish va xizmatlar sifatini oshirish boʻyicha muhim ishlar amalga oshirilayotganini taʼkidladi.

“UNWTO Yevropa mintaqaviy komissiyasining yigʻilishi turizm sohasida bilim va tajriba almashish uchun noyob imkoniyat yaratadi. Ishonchim komilki, ushbu uchrashuv Yevropa va Osiyo mintaqalarida turizmni barqaror rivojlantirishga koʻmaklashish uchun innovatsion yechimlarni joriy etish boʻyicha birgalikdagi saʼy-harakatlarimizga hissa qoʻshadi”, — dedi Umid Shodiyev.

Tadbirda Yevropa turizm sanoati yetakchilari ishtirok etib, mintaqada ham, undan tashqarida ham, shu jumladan, “Yevropa 2030” kun tartibi tashabbusi doirasida hamkorlikni mustahkamlash masalalarini muhokama qildilar. Joriy yildagi ikkinchi uchrashuv Yevropa mintaqasidagi muammolar va ularning yechimlarini muhokama qilish uchun 40 mamlakatdan yuqori darajali vakillarni bir joyga toʻpladi.

Yevropa Komissiyasi aʼzolari Komissiyaning 66-yigʻilishida Gretsiya tomonidan taklif qilingan “Yevropa 2030 kun tartibi — oʻzgarish uchun turizm” tashabbusini qabul qilish masalasini muhokama qildilar. Kun tartibidan koʻzlangan maqsad Yevropada turizmni faollashtirish, hamkorlik darajasini oshirish va UNWTOning boshqa mintaqalari bilan oʻzaro aloqalarni kuchaytirishdan iborat.

Maʼruzada taqdim etilgan Samarqand shahrida “Ipak yoʻli” boʻylab turizm boʻyicha tematik idorani tashkil etish” mavzusi Komissiyaning 69-yigʻilishida muhokama qilingan asosiy mavzulardan biriga aylandi.

Oʻzbekiston hukumati Ipak yoʻlining jahon turizmi tarixidagi muhim rolini eʼtirof etgan holda, “Ipak yoʻli” boʻylab turizmni rivojlantirishga bagʻishlangan birinchi UNWTO tematik ofisini tashkil etish taklifini ilgari surdi. Mazkur tashabbus Oʻzbekistonning turizmni barqaror rivojlantirishga intilayotganining yana bir belgisidir.

Taʼkidlash joizki, uchrashuv chogʻida Yevrokomissiya aʼzolari oʻrtasida samarali muhokamalar boʻlib, ular mintaqada barqaror turizmni rivojlantirish boʻyicha koʻp tomonlama hamkorlikka kelishib oldilar.