Kuni kecha S.Mirziyoyeva hamda Musulmon donishmandlar kengashi bosh kotibi Muhammad Abdusalom oʻrtasida uchrashuv boʻlib oʻtdi. Oʻzbekiston Prezidenti yordamchisi islom dini asosida yotgan umuminsoniy va maʼnaviy qadriyatlarni qoʻllab-quvvatlayotgani uchun mazkur xalqaro tashkilotga minnatdorlik bildirdi.

Shuningdek, Saida Mirziyoyeva har yili oʻtkaziladigan Shayx Zoid nomidagi “Insoniy birodarlik” mukofotining 2026-yilgi hakamlar hayʼati tarkibiga kiritilganidan benihoya mamnun ekanini izhor etdi.

“Faqat birgalikdagi saʼy-harakatlarimiz bilan biz bu dunyoni yanada yaxshiroq qila olamiz”, — deya taʼkidladi S.Mirziyoyeva.

Shayx Zoid nomidagi “Insoniy birodarlik” mukofoti — dunyo taraqqiyotiga katta hissa qoʻshayotgan, inson huquqlari, tinchlik va adolat uchun kurashayotgan shaxslarga beriladigan, xalqaro darajada eng yuqori baholanadigan yuksak eʼtiroflardan biridir.

Ushbu mukofot 2019-yilda Rim papasi Fransisk va Al-Azhar universiteti bosh imomi Ahmad At-Toyib oʻrtasida Abu-Dabida boʻlib oʻtgan tarixiy uchrashuv sharafiga taʼsis etilgan boʻlib, ular birgalikda insoniy birodarlik haqidagi hujjatni imzolagan edi.

BAA asoschisi marhum Shayx Zoid ibn Sulton Al-Nahayon nomi bilan ataladigan ushbu mukofot jamgʻarmasi 1 million dollar boʻlib, sovrin puli ijtimoiy muammolarga yechim topayotgan, tinchlik va birdamlikka hissa qoʻshayotgan shaxslar va tashkilotlar oʻrtasida taqsimlanadi.