Lochinlarga noqonuniy va shafqatsiz munosabat natijasida tabiatga katta miqdorda zarar yetkazildi. Bu haqida Ekologiya, atrof-muhitni muhofaza qilish va iqlim oʻzgarishi vazirligi maʼlum qildi.

Unda aytilishicha, Toshkent viloyati bojxona boshqarmasining Kontrabandaga qarshi kurashish boʻlimi tomonidan DXX Chegara qoʻshinlari harbiy xizmatchilari hamkorligida Boʻstonliq tumanida navbatdagi tezkor reyd tadbiri oʻtkazilgan.

Mazkur reyd davomida avvaldan kuzatuvga olingan shaxs “Oqtosh” qoʻriqlov punktida davlat chegarasini buzib oʻtgan holda harakatlanayotganida toʻxtatib qolingan.

Ushbu shaxsning yonidagi sumka belgilangan tartibda va xolislar ishtirokida koʻzdan kechirilganida 8 bosh tirik lochin qushlari topilgan.

Tekshiruv davomida huquqbuzar atrofdagilarga sezdirmaslik uchun qushlarga nisbatan shafqatsiz munosabatda boʻlgani oydinlashgan. Jumladan, qushlarning koʻz va oyoqlarini bogʻlab, qanotlarini skotchlagani hamda tor hajmdagi sumkaga zichlab joylagani maʼlum boʻlgan.

Toshkent viloyati Ekologiya, atrof-muhitni muhofaza qilish va iqlim oʻzgarishi boshqarmasi mutaxassislari tomonidan ushbu lochin qushlari Oʻzbekiston Qizil kitobiga kiritilgani va huquqbuzarlik natijasida hayvonot dunyosiga 4 milliard 944 million soʻm zarar yetkazilganligi aniqlangan.

Hozirda mazkur holat yuzasidan bojxona organlari tomonidan surishtiruv harakatlari boshlab yuborilgan.