Qatar Yevropa Ittifoqining kompaniyalarning barcha yetkazib berish zanjirlarini barqaror rivojlanish maqsadlariga muvofiqligini tekshirish boʻyicha direktivasi talablariga rozi boʻlmagani uchun Yevropaga suyultirilgan gaz yetkazib berishni toʻxtatish bilan tahdid qildi.

Bu haqda “Welt” nashri Qatar davlat energetika vaziri Saad al-Kaabining Belgiya hukumatiga yoʻllagan maktubiga tayanib yozmoqda.

“Yevropa Ittifoqi yetkazib berish zanjiri direktivasiga qoʻshimcha oʻzgartirishlar kiritishi kerak, aks holda Qatar davlati va QatarEnergy bizning suyultirilgan gaz va boshqa mahsulotlarimiz uchun yanada barqaror hamda ishbilarmonlik muhitini taʼminlovchi Yevropa Ittifoqidan tashqaridagi muqobil bozorlarni jiddiy koʻrib chiqishiga toʻgʻri keladi”, — deyiladi Belgiya rahbariyatiga 21-may kuni yuborilgan xatda.

Qatar energetika vazirligi rahbarining fikricha, Yevropa Ittifoqi direktivasi Qatarda amaldagi qonunlar va standartlarga aniq nomuvofiqliklar va ziddiyatlarni oʻz ichiga oladi. U har bir davlatning iqlim oʻzgarishi boʻyicha Parij kelishuvida mustahkamlangan ushbu sohadagi huquqiga ishora qiladi.

“Ishonchim komilki, kompaniyalar oʻz davlatlarining iqlim siyosati va Yevropa Ittifoqi qoidalari oʻrtasida tanlov qilishga majburlanmasliklari kerak”, — dedi Saad al-Kaabi oʻz maktubida.

Maqolada aytilishicha, Yevrokomissiya ham tegishli maktub olinganini tasdiqlagan va Yevropa Ittifoqi doirasida vaziyatni siyosiy yoʻl bilan tartibga solish ustida ish olib bormoqda.

Yevropa statistika idorasi — Yevrostat maʼlumotlariga koʻra, 2025-yilning birinchi choragida Qatar Yevropa Ittifoqiga suyultirilgan gaz yetkazib berish boʻyicha 10,8 foiz bilan AQSH (50,7 foiz) va Rossiyadan (17 foiz) keyin uchinchi boʻlgan.

Nashrning yozishicha, Rossiyadan ham, Qatardan ham import toʻxtatilsa, Yevropa Ittifoqi yetkazib berishning chorak qismidan koʻprogʻini qoplashga majbur boʻladi va Yevropaning bu sohada AQSHga qaramligi ham kuchayadi.

2022-yil bahorida eʼlon qilingan REPowerEU rejasida Yevropa Ittifoqi davlatlari 2027-2028-yillarda Rossiya gaz quvurlarini bosqichma-bosqich toʻxtatishni maqsad qilib qoʻygan. Oʻshandan beri Rossiya gaz importi tarkibida kichik oʻzgarishlar roʻy berdi: suyultirilgan gazning ulushi taxminan 40 foizgacha koʻtarildi va quvur gazining ulushi taxminan 70 foizdan 60 foizgacha kamaydi.

2023-yil may oyida Rossiya Gʻarb Rossiyadan uglevodorodlarni sotib olishdan bosh tortib, jiddiy xatoga yoʻl qoʻyganini, narxlarning oshishi tufayli u yangi, kuchliroq qaramlikka tushib qolishini bildirgandi.