Jahongir BOYMURODOV/“Xalq soʻzi”. Mustaqilligimizning 33 yilligi shodiyonalari arafasida Qarshi shahrining Choʻlquvar mahallasida “Yashil zamin” turar-joy majmuasi foydalanishga topshirildi.

Loyiha qiymati 110 milliard soʻmni tashkil etgan ushbu majmua 432 xonadonga moʻljallangan 5 ta koʻp qavatli uy, zamonaviy bolalar maydonchasi, marosimlar zali, yopiq avtomobillar qoʻyish maydonchalari, dekorativ sharshara va favvoralar hamda yashil hududlarni oʻz ichiga olgan.

Eʼtiborli tomoni, majmua bilan yonma-yon joylashgan Qarshi shahridagi 11-umumiy oʻrta taʼlim maktabi uchun ham tadbirkor tomonidan homiylik asosida 900 oʻringa moʻljallangan yangi bino qurib berilganidir.

11 milliard soʻm mablagʻ evaziga barpo etilgan 5 qavatli binoda 30 ta sinfxona hamda faollar zali, bino tashqarisida zamonaviy voleybol hamda mini-futbol maydonchalari mavjud.

“Yashil zamin” turar-joy majmuasi hamda yangi maktab binosining foydalanishga topshirilishi mahalla ahli uchun katta shodiyonaga aylanib ketdi. Ayniqsa, tadbir doirasida majmuadagi 6 ta xonadon ehtiyojmand oilalarga bepul sovgʻa qilgani, 11 nafar kam taʼminlangan oila farzandlarining sunnat toʻylari oʻtkazib berilishi ham koʻpchilikning olqish-u duolariga sabab boʻldi.

Shu kuni Qarshi shahrining Oydin mahallasida ham 135 xonadonga moʻljallangan yana ikkita koʻp qavatli uy foydalanishga topshirildi.