Toshkent viloyatining Parkent tumanida yuz bergan qaygʻuli holat — uch nafar voyaga yetmagan bolaning suv havzasida choʻkib vafot etishi jamoatchilikda katta tashvish uygʻotdi. Mazkur voqea yuzasidan mutasaddi tashkilotlar tomonidan tergovga qadar tekshirish harakatlari olib borildi va qonunbuzarlik holatlari aniqlandi.

Oʻzbekiston Respublikasi Bosh prokurorining matbuot kotibi — axborot siyosati masalalari boʻyicha maslahatchi bu haqda rasmiy maʼlumot berdi.

Tekshirish jarayonida maʼlum boʻlishicha, tuman hududidan oʻtuvchi “Parkentsoy” kanalidagi suv oqimi yoʻnalishi boʻylab sunʼiy ravishda hosil boʻlgan, chuqurligi taxminan 2 metr va oʻlchami 20×40 metrni tashkil etuvchi suv havzasida hech qanday ogohlantiruvchi yoki taʼqiqlovchi belgilar oʻrnatilmagan. Shu bilan birga, mahalliy aholi orasida bu xavfli hudud boʻyicha tushuntirish ishlari olib borilmagani hamda xavfni bartaraf etish choralari koʻrilmagani aniqlangan.

Holat yuzasidan kasbiy vazifalarini lozim darajada bajarmaganlik va mansabga sovuqqonlik bilan yondashish alomatlari mavjudligi bois, Oʻzbekiston Respublikasi Jinoyat kodeksining 116-moddasi (kasb yuzasidan oʻz vazifalarini bajarmaslik) hamda 207-moddasi (mansabga sovuqqonlik bilan qarash) asosida jinoyat ishi qoʻzgʻatildi.

Ayni vaqtda ish boʻyicha barcha zarur tergov harakatlari olib borilmoqda. Voqeaga olib kelgan sabab va shart-sharoitlar har tomonlama oʻrganilib, isbotlanishi lozim boʻlgan holatlar aniqlanadi. Tergov yakunlari boʻyicha qonunga muvofiq ravishda yakuniy qaror qabul qilinishi maʼlum qilindi.