Investitsiyalar, sanoat va savdo vaziri Laziz Kudratov boshchiligidagi delegatsiya AQSHda boʻlib, foydali qazilmalar sohasida kelishuvlarga erishdi.

7-aprel kuni delegatsiya togʻ-kon sanoati, mehmonxona biznesi va oziq-ovqat sanoati yoʻnalishlarida faoliyat yurituvchi kompaniyalar bilan muzokaralar olib bordi. Uchrashuvlarda Oʻzbekistonda biznes yuritish imkoniyatlari, yaratilgan sharoitlar va sarmoya uchun qulay muhit haqida taqdimotlar boʻlib oʻtdi.

Yakunda foydali qazilmalar sohasida hamkorlik boʻyicha kelishuvlar imzolandi. Unga muvofiq, foydali qazilma konlarini izlash va qazib olishga sarmoya jalb qilish, yuqori darajada maydalash komplekslarini qurish, innovatsion texnologiyalarni joriy etish hamda oʻzbekistonlik mutaxassislarning malakasini oshirish boʻyicha rejalar belgilandi.

Bundan tashqari, mehmonxonalar qurilishi boʻyicha hamda turizm sohasida yangi loyihalar muhokama qilinib, ularni amalga oshirish muddatlari kelishib olingan.

Ayni paytda imzolangan kelishuvlarning tafsilotlari ochiqlanmadi, lekin loyihalar boʻyicha masʼul loyiha menejerlari tayinlangan va kelishuvlar tegishli hujjatlar bilan huquqiy jihatdan mustahkamlangan.