Инвестициялар, саноат ва савдо вазири Лазиз Кудратов бошчилигидаги делегация АҚШда бўлиб, фойдали қазилмалар соҳасида келишувларга эришди.

7 апрель куни делегация тоғ-кон саноати, меҳмонхона бизнеси ва озиқ-овқат саноати йўналишларида фаолият юритувчи компаниялар билан музокаралар олиб борди. Учрашувларда Ўзбекистонда бизнес юритиш имкониятлари, яратилган шароитлар ва сармоя учун қулай муҳит ҳақида тақдимотлар бўлиб ўтди.

Якунда фойдали қазилмалар соҳасида ҳамкорлик бўйича келишувлар имзоланди. Унга мувофиқ, фойдали қазилма конларини излаш ва қазиб олишга сармоя жалб қилиш, юқори даражада майдалаш комплексларини қуриш, инновацион технологияларни жорий этиш ҳамда ўзбекистонлик мутахассисларнинг малакасини ошириш бўйича режалар белгиланди.

Бундан ташқари, меҳмонхоналар қурилиши бўйича ҳамда туризм соҳасида янги лойиҳалар муҳокама қилиниб, уларни амалга ошириш муддатлари келишиб олинган.

Айни пайтда имзоланган келишувларнинг тафсилотлари очиқланмади, лекин лойиҳалар бўйича масъул лойиҳа менежерлари тайинланган ва келишувлар тегишли ҳужжатлар билан ҳуқуқий жиҳатдан мустаҳкамланган.