Ayni kunlarda Bangladesh poytaxti Dakka shahrida amputantlar futboli boʻyicha Osiyo chempionati boʻlib oʻtmoqda. Ilk bor tashkil etilayotgan ushbu qitʼa birinchiligida Oʻzbekiston terma jamoasi ham munosib ishtirok etmoqda.

Hamyurtlarimiz musobaqaning ilk turida Indoneziyaga qarshi maydonga tushib, 8:1 hisobida magʻlubiyatga uchratgan boʻlsa, ikkinchi turida Nepal jamoasi darvozasiga javobsiz 13 ta gol kiritdi.

Oʻzbekiston terma jamoasi 3-tur bahsi doirasida mezbon sportchilar, Bangladesh termasiga qarshi oʻynadi va 3:0 hisobida gʻalaba qozondi.

Shu tariqa guruhda 9 ochko jamgʻargan vakillarimiz chempionat yarim finalini naqd qildi. Mazkur bahs esa bugun, 11-fevral kuni boʻlib oʻtdi. Unda anʼanaga muvofiq, iroqlik sportchilar yirik hisobda magʻlub etildi.

Iroq terma jamoasi darvozasini 3-marta ishgʻol qilgan Oʻzbekiston vakillari bahs davomida oʻz darvozasi daxlsizligini saqlab qoldi va final yoʻllanmasini qoʻlga kiritdi.

Finalda jamoa ertaga, 12-fevral kuni Indoneziya yoki Nepalga qarshi bahs olib boradi.

Maʼlumot uchun, Oʻzbekiston amputantlar terma jamoasi Jahon chempionati tarixida yettita medalni: uchta oltin (2007, 2010, 2012), bitta kumush (1998) va uchta bronza (1991, 2002, 2022) qoʻlga kiritgan.