Osiyo Paralimpiya qoʻmitasi prezidenti Majid Abdulla Rashid boshchiligidagi delegatsiya aʼzolari amaliy tashrif bilan yurtimizda boʻlishdi.

Tashrifning ikkinchi kunida janob Majid Abdulla Rashid oʻz hamrohlari bilan koʻhna va hamisha navqiron Samarqand shahrida boʻlishdi. Samarqandga tashrifi doirasida yuqori martabali “Ipak yoʻli” turizm xalqaro universiteti bilan tanishdi.

Tashrifdan koʻzlangan maqsad – turizm va sport sohasida belgilangan rejalarni amalga oshirishda universitet faoliyati bilan tanishish edi.

Tashrif davomida mehmonlar universitetda imkoniyati cheklangan insonlarga yaratilgan sharoitlar, talabalarning laboratoriyalarda amaliy mashgʻulotlar oʻtkazishi, ularning sport va ijodiy ish bilan shugʻullanishi uchun jihozlangani, zamonaviy kutubxonada Osiyo tarixi, madaniyati va merosi haqida nodir nashrlar toʻplangan katta adabiy zaxira mavjudligiga alohida eʼtibor qaratishdi.

Uchrashuv yakunida janob Majid Abdulla Rashid universitet talabalari uchun yaratilgan imkoniyatlarni yuqori baholadi va ularga nafaqat sport sohasida, balki oʻqishda ham muvaffaqiyat tiladi.