Bugun AOKA shtabida Bosh davlat sanitariya inspektori Nurmat Otabekov ishtirokida brifing oʻtkazildi.

Unda muhim savol va murojaatlar yuzasidan javob qaytarildi:

Savol: Nega koronavirus infeksiyasi aholi orasida koʻpaymoqda?

Javob: Karantin choralari yumshatilganidan soʻng koʻpchilik karantin qoidalariga rioya qilmay qoʻydi. Niqoblarni haftalab almashtirmay, ijtimoiy masofaga rioya qilmay qoʻyishdi.

Keng aholi qatlami bilan muloqot boshlanib ketgani natijasida aholi orasida koronavirus yuqtirganlar aniqlana boshlandi.

Savol: Yana karantin joriy qilinadimi?

Javob: Aslida karantin tadbirlari bekor qilingani YOʻQ!

Aholi orasida kasallanish surʼati shu tarzda oshib borsa karantin tadbirlari yana-da kuchaytirilishi mumkin.

Savol: Nega bizning respublikamizda kasallik yengil oʻtyapti? Qariyb 80% bemor kasallikdan tuzalayotganini sababi nimada?

Javob: Koronavirus infeksiyasi asosan 80% holatda yengil kechadi, 15% holatda oʻrta ogʻirlikda va faqat 3-5% holatda ogʻir, yaʼni nafas yetishmovchiligi bilan kechadi.

Kasallikga chalinganlarni erta aniqlash ishlarining yoʻlga qoʻyilganligi kasallik kechishida ijobiy natijalarga erishish imkonini beryapti.

Biroq virusning kultural, morfologik, antigen, serologik xususiyatlari, virulentligi, patogenligi kabi masalalar hali koʻplab oʻrganiladi. Shuning uchun aniq biror toʻxtamga kelishga hali erta.