O‘zbekiston Respublikasi Sudyalar oliy kengashi huzuridagi Sudyalar oliy maktabida “Mediatsiya instituti rivojlanishining zamonaviy tendensiyalari va sud amaliyoti” mavzusidagi xalqaro ilmiy-amaliy konferensiya bo‘lib o‘tdi.

Konferensiyada Oliy Majlis Qonunchilik palatasi Spikeri o‘rinbosari M.Xo‘jayeva, Senat a’zosi M.Qodirxonova, Oliy sudi raisi o‘rinbosari Sh.Polvonov, sudyalar, professor-o‘qituvchilar, doktorantlar hamda ommaviy axborot vositalari vakillari, shuningdek, Turkiya, Qirg‘iziston, Ozarbayjon va Qozog‘iston kabi mamlakatlarning yuqori malakali sudyalari, mediatorlar, huquqshunos olimlar va tahlilchilar faol ishtirok etishdi.

Anjumanda xorijiy ekspertlar oilaviy nizolarda mediatsiyaning afzalliklari, tijorat nizolarida majburiy mediatsiyaning samaradorligi, nizolarni muqobil hal qilishning huquqiy asoslari, iqtisodiy nizolarni hal etishdagi mediatsiyaning o‘rni haqida so‘z yuritildi.

Anjuman davomida savol-javoblar va munozaralar bo‘lib o‘tdi. Qatnashchilar tomonidan mediatsiyani rivojlantirish bo‘yicha samarali ilmiy-amaliy tavsiyalar bildirildi. Shuningdek, xalqaro tajriba va milliy amaliyotni uyg‘unlashtirish orqali sud tizimida yuzaga keladigan yuklamani kamaytirish, jamiyatda murosaga tayyorlik ruhini mustahkamlash masalalari muhokama etildi.