Arxiv foto

Xitoylik tadbirkorlar Rossiyaning Saxalin viloyatida bir nechta yirik markazlarni, jumladan, uchuvchisiz uchish apparatlarini ishlab chiqarishni tashkil etishni taklif qilishdi.

Muhokama Rossiya — Xitoy forumi doirasida viloyat gubernatori Valeriy Limarenko ishtirokida boʻlib oʻtdi.

“Kompaniyalar qishloq xoʻjaligi, savdo, uchuvchisiz texnologiyalar va boshqa sohalardagi loyihalarni amalga oshirishga qiziqish bildirishdi”, — deyiladi manbada.

Saxalinda dron ishlab chiqarishni tashkil etish taklifi “RUNFA” investitsiya guruhi tomonidan berilgan. Limarenko buni hudud uchun istiqbolli deb atadi. Uning taʼkidlashicha, dronlar mintaqada turli maqsadlarda — poligonlarni kuzatish, oʻrmon yongʻinlari va ular bedarak yoʻqolganlarni qidirishda ham qoʻllaniladi. Shuningdek, Saxalinda ulgurji tarqatish markazi, meva-sabzavot va rezavor mevalar yetishtirish uchun issiqxona majmuasi, “Ipak yoʻli” savdo-koʻngilochar ham majmuasini qurish taklif etildi.

Avvalroq, Ukraina Xitoyni Rossiyaga dronlar ishlab chiqarishda yordam berishda ayblagandi. Ukraina tashqi razvedka xizmati matbuot kotibi Oleg Aleksandrovning soʻzlariga koʻra, Xitoy ishlab chiqaruvchilari Rossiyani uskunalar, elektronika, navigatsiya, optik va telemetriya tizimlari, dvigatellar, mikrosxemalar, protsessor modullari, boshqaruv platalari kabilar bilan taʼminlagan.

“Xitoy kompaniyalari nomlarini oʻzgartiradilar, eksport nazoratidan va sanksiyalardan qochish uchun hamma narsani qiladilar. Shu bilan birga, Pekin rasmiy ravishda barcha qoidalarga amal qiladi, lekin faqat rasman”, — deydi Aleksandrov.

Shu yilning 29-may kuni Ukraina prezidenti Vladimir Zelenskiy Xitoy Ukrainaga frontda mashhur boʻlgan “Mavic” dronlarini sotishni toʻxtatganini, lekin ularni Rossiyaga yetkazib berishda davom etayotganini aytgandi.

Oʻz navbatida, Xitoy Rossiyaga dronlar yoki ularning tarkibiy qismlarini harbiy maqsadlarda yetkazib berish haqidagi ayblovlarni muntazam rad etib keladi.