Bugungi islohotlar mazmuni “Inson qadri uchun” tamoyilining mohiyatiga qaratilgan. Bunda, avvalo, mahallada aholi uchun munosib turmush sharoitini yaratish, ularning muammolarini tizimli hal etish va roziligiga erishish bosh maqsad qilib olingani saʼy-harakatlarga qanot boʻlayotir.

Xalqona qadriyatlarimiz mahallada shakllanib, tobora sayqal topib boryapti, desak, toʻgʻri boʻladi. Shu maqsadda Jizzax viloyatida Mahalla va nuroniylarni qoʻllab-quvvatlash vazirligi hamda hamkor tashkilotlarning tashabbusi bilan tizimli tadbirlar tashkil etilmoqda.

Forish tumanidagi Ilonli qishlogʻida istiqomat qiluvchi Qobil bobo Olqorov bu yil 85 yoshni qarshi oladi. Oʻtgan asrning ayni qahatchilik yillarida tugʻilib, umri tayoq ushlab, tuyoq orqasida oʻtgan Qobil bobo yigitlik chogʻidayoq chorvador boʻlib nom chiqargan. Elda azizlik martabasiga erishgan. 10 farzandni oq yuvib, oq taragan, sakson nafardan ziyod nevara-evaralarning bobosi boʻlgan Qobil boboning hayot haqiqati bugungi avlod uchun oʻrnak, istiqbol qadamlariga mustahkam zamin.

Qobil bobo singari insonlar oilalarning bebaho nuroniylari, yurtimizning fayzi shukuhi. Nuroniylar tajribasini yoshlar tarbiyasi uchun bogʻcha yoshidanoq qoʻllash, ularga toʻgʻri yoʻl koʻrsatish kerak. Ayni mana shu mantiqqa asoslangan mahalla va nuroniylarni qoʻllab-quvvatlash tizimi yoshlar hayotining barcha bosqichini qamrab olgan.

Vatanni sevish, uni asrab avaylash, bu — oʻzbekona tarbiyaning asosi. Nuroniy otaxon-onaxonlar va yoshlar suhbati Jizzax choʻllarini oʻzlashtirish jarayonlari, bugungi kunda amalga oshirilayotgan islohotlar, mamlakatimizda inson manfaatlarini ulugʻlash borasida amalga oshirilayotgan ishlar xususida boʻldi.

Qayd etish kerak, xalq bilan muloqot qilish, aholi muammolarini chuqur oʻrganish va ularga yechim topish muhim masalalardan biri.

Fikrimizni Jizzax viloyatidagi ayrim tumanlar va Sirdaryo viloyatlarida amalga oshirilayotgan ishlar bilan davom ettirsak.

Tahlillarga koʻra, joylarda amalga oshirilgan ishlar barobarida fuqarolarni tashvishga solayotgan va yechimini kutib turgan masalalar yetarli. Misol uchun, Doʻstlik tumanidagi 63 ta koʻpqavatli uylarda 888 ta, 23 ta eski barak uylarda 140 xonadon istiqomat qiladigan Chinobod mahallasi aholisi bilan muloqotlarda koʻpqavatli uylar atrofidagi infratuzilma obyektlari qurilishi nihoyasiga yetkazilmaganligi ayon boʻldi. Kompleks tadbirlar doirasida masalalar ijobiy hal etilmoqda.

Shu bilan birga, Mahalla va nuroniylarni qoʻllab-quvvatlash vazirligi boshchiligidagi tegishli idoralar rahbarlaridan iborat ishchi guruh Arnasoy tumanidagi Chinobod va Bobur nomli, Zarbdordagi Andijon nomli qishloqlar kabi markazdan olis va eng chekka, sharoiti nisbatan ogʻir 16 ta aholi yashash manzilida oʻtkazgan oʻrganishlari davomida fuqarolar bilan yuzma-yuz muloqot qilinib, aniqlangan 200 dan ziyod ijtimoiy muammolarga yechim belgilandi.

Hayot va turmush muammolari yechimiga qaratilgan ana shunday ishlar Sirdaryo viloyatida ham tatbiq etilmoqda. Mahalla va nuroniylarni qoʻllab-quvvatlash vazirligi boshchiligidagi ishchi guruh Sirdaryo viloyatida aniqlangan muammolarni bartaraf etish maqsadida yigirmadan ziyod olis hududlarida boʻlib, aholi bilan muloqotlar oʻtkazdi.

Odamlar koʻz oʻngida turmush uchun salbiy taʼsirga ega holatlarni tezda bartaraf etishning aniq muddatlari belgilandi. Misol uchun, Sardoba tumanining markazdan uzoq Fayzliobod mahallasiga eltuvchi tuzukroq yoʻlning oʻzi yoʻq, elektr taʼminoti esa taʼmirtalab. Bu ishlar mahalla masʼullari va Xalq qabulxonalari mutasaddilari nazorati ostida avgust oyigacha toʻliq yakunlanadigan boʻldi.

Soatlar oʻtmasdan ishlab boshlandi, qurilish materiallari keltirilib, taʼmirlash ishlari keng koʻlamda boshlab yuborildi. Avval 15 kilometrga yaqin ichki yoʻllar va yana shuncha trotuarlar quriladigan boʻldi. Bir vaqtning oʻzida elektr hamda ichimlik suvi taʼminotini yaxshilash boʻyicha ham ishlar boshlandi.

Yana bir jihat shundaki, muammolar yechimida, aholi bilan muloqotlarda nuroniylarning oʻrni alohida. Sharqona tarbiya shundayki, katta avlod vakillari kichiklarga doimo oʻrnak boʻlib keladi. Bu esa yurtimiz rivoji va yoshlar tarbiyasida muhim oʻringa ega.