Maʼlumki, Oʻzbekiston Respublikasi Prezidentining 2025-yil 2-apreldagi 134-sonli qaroriga asosan 2025/2026-yil isitish mavsumida aholining muhtoj qatlamiga 1 mln soʻmdan bir martalik moddiy yordam ajratish koʻzda tutilgan.

Ijtimoiy himoya milliy agentligi Jamoatchilik bilan aloqalar boʻlimi boshligʻi Dilfuzabegim Roʻzmetova Oʻzbekiston milliy matbuot markazida jamoatchilikka ushbu yoʻnalishda amalga oshirilgan ishlar yuzasidan maʼlumot taqdim etdi.

Unda aytilishicha, Ijtimoiy himoya milliy agentligi tomonidan 1 million 162 mingdan ziyod ehtiyojmand oilalar roʻyxati shakllantirilgan.

Ushbu moddiy yordam oluvchi oilalar roʻyxatiga quyidagi toifadagi oilalar kiritilgan:

• “Ijtimoiy himoya yagona reyestri” va “Kambagʻal oilalar reyestri”dagi 822 ming oila;
• Reyestrlarga kirmagan, lekin “mahalla yettiligi” yordamga muhtoj deb topgan qoʻshimcha 290 ming oila.

Shuningdek, ushbu 290 mingta oilalar roʻyxatini tuzishda har bir mahalla, oʻz hududida yashaydigan qarorda belgilangan oilalardan tashqari, yordam soʻrab tez-tez murojaat qiladigan aholi ham qamrab olingan.

Mahalla yettiligi tomonidan qoʻshimcha ehtiyojmand oilalar roʻyxatini shakllantirishda birinchi navbatda 34 ming boquvchisi yoʻq, 7 ming oʻzgalar parvarishiga muhtoj yolgʻiz keksalar, 76 ming nogironligi boʻlgan yoki 24 ming ogʻir kasal aʼzolari mavjud, 2 ming gaz taʼminoti yoʻq koʻp qavatli uylarda hamda 26 ming uch va undan ortiq oila birgalikda yashovchi oilalarga qarorga muvofiq ustuvorlik berilgan.

Shuningdek, faqat pensiya (nafaqa)ga yashovchi 69,7 mingta, boquvchisi migratsiyada boʻlib, kam daromad oluvchi 35 mingta, vaqtincha ishsiz aʼzosi boʻlgan 15,2 mingta va yakka yolgʻiz yashovchi 2,3 mingta ehtiyojmand oila (jami 122 ming) qoʻshimcha ravishda qamrab olingan.

Bundan tashqari, kambagʻallikdan chiqqan biroq, qayta kambagʻallikka tushish xavfi boʻlgan 53 ming oila hamda Oilaviy bolalar uylari ochgan yoki bolalarni patronatga olgan 360 ta oilalarga ham moddiy yordam toʻlab berilishi belgilandi.

Qoʻshimcha oilalar roʻyxatini shakllantirishda oilaning mol-mulki mavjudligini vazirlik va idoralarning axborot tizimlaridan olingan maʼlumotlarga asosan inson omilisiz baholash dan oʻtkazildi. Natijada, 99,3 mingta oʻziga toʻq oilaning moddiy yordam oluvchi oilalar roʻyxatga asossiz kirishini oldi olingan.

«Bir martalik moddiy yordam toʻlash uchun 1,2 trln soʻmlik mablagʻ tijorat bankiga toʻliq moliyalashtirib berildi. 30-oktyabr kuni plastik kartasi bor aholiga butun summa oʻtkazib berildi. Bank plastik kartasi boʻlmaganlarga oilalarga naqd pul koʻrinishida “sayyor kassalar” tomonidan pullar toʻlab berilmoqda», — deyiladi agentlik xabarida.

Maʼlumot uchun, aholi murojaatlariga oʻz vaqtida javob berish uchun agentlik huzurida 11-40 qisqa raqami yoʻlga qoʻyilgan.