Маълумки, Ўзбекистон Республикаси Президентининг 2025 йил 2 апрелдаги 134-сонли қарорига асосан 2025/2026 йил иситиш мавсумида аҳолининг муҳтож қатламига 1 млн сўмдан бир марталик моддий ёрдам ажратиш кўзда тутилган.

Ижтимоий ҳимоя миллий агентлиги Жамоатчилик билан алоқалар бўлими бошлиғи Дилфузабегим Рўзметова Ўзбекистон миллий матбуот марказида жамоатчиликка ушбу йўналишда амалга оширилган ишлар юзасидан маълумот тақдим этди.

Унда айтилишича, Ижтимоий ҳимоя миллий агентлиги томонидан 1 миллион 162 мингдан зиёд эҳтиёжманд оилалар рўйхати шакллантирилган.

Ушбу моддий ёрдам олувчи оилалар рўйхатига қуйидаги тоифадаги оилалар киритилган:

• «Ижтимоий ҳимоя ягона реестри» ва «Камбағал оилалар реестри»даги 822 минг оила;
• Реестрларга кирмаган, лекин «маҳалла еттилиги» ёрдамга муҳтож деб топган қўшимча 290 минг оила.

Шунингдек, ушбу 290 мингта оилалар рўйхатини тузишда ҳар бир маҳалла, ўз ҳудудида яшайдиган қарорда белгиланган оилалардан ташқари, ёрдам сўраб тез-тез мурожаат қиладиган аҳоли ҳам қамраб олинган.

Маҳалла еттилиги томонидан қўшимча эҳтиёжманд оилалар рўйхатини шакллантиришда биринчи навбатда 34 минг боқувчиси йўқ, 7 минг ўзгалар парваришига муҳтож ёлғиз кексалар, 76 минг ногиронлиги бўлган ёки 24 минг оғир касал аъзолари мавжуд, 2 минг газ таъминоти йўқ кўп қаватли уйларда ҳамда 26 минг уч ва ундан ортиқ оила биргаликда яшовчи оилаларга қарорга мувофиқ устуворлик берилган.

Шунингдек, фақат пенсия (нафақа)га яшовчи 69,7 мингта, боқувчиси миграцияда бўлиб, кам даромад олувчи 35 мингта, вақтинча ишсиз аъзоси бўлган 15,2 мингта ва якка ёлғиз яшовчи 2,3 мингта эҳтиёжманд оила (жами 122 минг) қўшимча равишда қамраб олинган.

Бундан ташқари, камбағалликдан чиққан бироқ, қайта камбағалликка тушиш хавфи бўлган 53 минг оила ҳамда Оилавий болалар уйлари очган ёки болаларни патронатга олган 360 та оилаларга ҳам моддий ёрдам тўлаб берилиши белгиланди.

Қўшимча оилалар рўйхатини шакллантиришда оиланинг мол-мулки мавжудлигини вазирлик ва идораларнинг ахборот тизимларидан олинган маълумотларга асосан инсон омилисиз баҳолаш дан ўтказилди. Натижада, 99,3 мингта ўзига тўқ оиланинг моддий ёрдам олувчи оилалар рўйхатга асоссиз киришини олди олинган.

«Бир марталик моддий ёрдам тўлаш учун 1,2 трлн сўмлик маблағ тижорат банкига тўлиқ молиялаштириб берилди. 30 октябрь куни пластик картаси бор аҳолига бутун сумма ўтказиб берилди. Банк пластик картаси бўлмаганларга оилаларга нақд пул кўринишида «сайёр кассалар» томонидан пуллар тўлаб берилмоқда», — дейилади агентлик хабарида.

Маълумот учун, аҳоли мурожаатларига ўз вақтида жавоб бериш учун агентлик ҳузурида 11-40 қисқа рақами йўлга қўйилган.